धनकुटा २७ बैशाख ।
देशमा संघीय व्यवस्था लागू भएपछि प्रदेशको राजधानी धनकुटा बनाउनु पर्छ भनेर आन्दोलन चल्यो । हरेक दृष्टिकोणले धनकुटा नै राजधानी हुनुपर्ने भएता पनि अघिल्लो सरकारले विराटनगरलाई अस्थायी राजधानी तोकिदियो । र, अहिलेको बहुमत सांसदहरुले त्यसैलाई सदर गर्दै स्थायी राजधानी बनाई दियो ।
राजधानी विराटनगर तोकिए पछि धनकुटाको अस्तित्व समाप्त हुने भन्दै धनकुटा बचाउ अभियान गठन गरियो । सो अभियानले धनकुटाका प्रदेश सांसदहरुले धनकुटा राजधानी बनाउने प्रस्ताव प्रस्तुत गरेपनि पछि फिर्ता लिएपछि आन्दोलन चलाए । आन्दोलन भएपछि प्रदेश सरकारबाट धनकुटावासीको केके मागहरु छन्, सक्ने जति पुरा गर्ने आश्वासन आएपछि अभियान्ताहरुले धनकुटावासीहरुसँग व्यापक छलफल गरी केहि बुदाँगत मागहरु प्रधानमन्त्री तथा मुख्यमन्त्री समक्ष जिल्ला प्रशासन कार्यालयमार्फत पठाएको छ ।
केन्द्र र प्रदेश सरकार समक्ष राखिएको मागहरुमा पहिलो माग धनकुटामा मेडिकल कजेल स्थापना राखिएको छ । यसलगायत धनकुटालाई कृषि, पर्यटन, शिक्षा र स्वास्थ्यको हव बनाई धनकुटालाई पुनः जीवन्तता दिनका लागी प्रधानमन्त्री तथा मुख्यमन्त्रीलाई माग राखिएको छ ।
यस्तै एयरपोर्टको निर्माण, प्रदेशस्तरीय विश्वविद्यालय, सिटिईभिटीको कार्यालय स्थापनामा जोड दिएको छ । यस्तै श्रम, पर्यटन, कर, स्टाफ कजेल, ट्रायलसहितको यातायात कार्यालयको स्थापना गर्नु पर्ने माग रहेको अभियान्ता तथा घरेलु महासंघ धनकुटका अध्यक्ष विजयसन्ताषी राईले जानकारी दिए ।
यसैगरी उत्तरपानीस्थित प्राविधिक शिक्षालयलाई स्रोन्नती गरी पोलिटेक्निक इन्स्टिच्युट र कृषि क्याम्पस पाख्रिवासलाई स्तरोन्नती गर्नुपर्नेलगायतका महत्वपूर्ण मागहरु पुरा गराउनका लागी मागपत्र पठाएको नेपाल पत्रकार महासंघ धनकुटाका अध्यक्ष तथा धनकुटा बचाउ अभियानका संयोजक राजेश्वरबहादुर श्रेष्ठले बताए ।
यी मागहरु पुरा भए धनकुटा मृत शहर हुनबाट बच्ने छ । यो मागहरुका वारेमा तत्काल संवोधन हुनुपर्ने यदि संवोधन नगरिएमा सशक्त आन्दोलन गर्न बाध्य हुने धनकुटा प्रादेशिक राजधानी अभियान समितिका संयोजक सुन्दरबाबु श्रेष्ठले बताए ।
सो पत्र पत्रकार महासंघ धनकुटाका अध्यक्ष तथा धनकुटा बचाउ अभियानका संयोजक राजेश्वरबहादुर श्रेष्ठले पढेर बुझाएका थिए । सो पत्र बुझ्दै जिल्ला प्रशासन कार्यालयका प्रशासकीय अधिकृत सुधिर साफिले सम्बन्धित निकायमा तत्काल पठाईने जानकारी दिए ।
सो पत्रमा महासंघ अध्यक्ष तथा अभियानका संयोजक राजेश्वरबहादुर श्रेष्ठ, धनकुटा राजधानी अभियान समितिका संयोजक सुन्दरबाबु श्रेष्ठ, धनकुटा उद्योग बाणिज्य संघका अध्यक्ष उमेश घिमिरे, घरेलु तथा साना उद्योग महासंघ धनकुटाका अध्यक्ष विजयसन्तोषी राईले हस्ताक्षर गरेका थिए ।
आईतवार मुख्यमन्त्री शेरधन राई धनकुटामा मुख्यमन्त्रीको सम्पर्क कार्यालय उद्घाटनका लागि आउने कार्यक्रम रहेको छ । सम्म्भव भए सोहि दिन यातायातको कार्यालयको पनि उद्घाटन गर्न सक्ने जनाएको छ । सो अवसरमा सो माग वारेमा संवोधन हुनसक्ने पनि अपेक्षा राखिएको संयोजक श्रेष्ठले बताए ।