धनकुटा । नेपाल प्रेस युनियन धनकुटा शाखाले प्रमुख जिल्ला अधिकारमार्फत नेपाल सरकारलाई ज्ञापनपत्र बुझाएका छन् । सो ज्ञापनपत्रमा नेपालका पत्रकारहरुको भौतिक तथा पेशागत सुरक्षाका लागी तथा मिडिया काउन्सिल बिधेयकमा प्रेस स्वतन्त्रता विरोधी प्रावधान हटाएर मात्र पास गर्न माग गरिएका छन् ।
ज्ञापनपत्रमा लामो समयदेखि विभिन्न सरकारी संचार माध्यममा कार्यरत व्यावसायिक पत्रकारहरुलाई कार्यकर्ता भर्तिकेन्द्रका रुपमा रुपान्तरण गर्न हटाएको भन्दै ती सञ्चारकर्मीहरुलाई यथाशीध्र पुर्नवहाली गर्न समेत माग गरिएको छ ।
सो ज्ञापनपत्र युनियनका अध्यक्ष हिमा चेम्जोङ, युनियनका केन्द्रिय उपाध्यक्ष विजयसन्तोषी राई, नेपाल पत्रकार महासंघ धनकुटाका अध्यक्ष राजेश्वरबहादुर श्रेष्ठले संयुक्त रुपमा प्रमुख जिल्ला अधिकारी डा. कृष्णबहादुर घिमिरेलाई हस्तान्तरण गरेका थिए ।
ज्ञापनपत्र बुझाउन अघि युनियनका सहसचिव शर्मिला राईले वाचन गरेर सुनाएका थिए ।
सो अवसरमा पत्रकार महासंघ धनकुटाका पूर्व अध्यक्ष तथा प्रेस युनियन पूर्व अध्यक्षहरु मोहन बान्तवा, खगेन्द्र घिमिरे, पत्रकार महासंघका सचिव विदुर खवास, युनियनका केन्द्रिय पार्षदहरु सुमना तिम्सिना, विनोद घिमिरे, युनियनका जिल्ला उपाध्यक्ष नरेन्द्र कश्चित, कोषाध्यक्ष पूर्ण कुमार चौधरी, प्रदेश पार्षद कविराज घिमिरे, पत्रकारहरु कृष्णा राई, सुनिल सिंहलगायतका संचारकर्मीहरुको सहभागीता रहेको थियो ।
सो अवसरमा अध्यक्ष हिमा चेम्जोङले रेडियो नेपाल सुदरपश्चिम प्रादेशिक केन्द्र दिपायलमा लामो समयदेखि कार्यरत ३ जना व्यावसायिक पत्रकारहरुलाई हटाउने र स्टिङगर रिर्पोटरहरुको समेत म्याद थप नगरी कार्यकर्ता भर्ति गर्ने काम धमाधम भैरहेकोले यसलाई अभिलम्ब बन्द गर्न ज्ञापन पत्र बुझाउनु परेको बताईन । उनले सरकारले ती सञ्चारकर्मीहरुलाई यथाशीघ्र पुनर्बहाली गर्न ज्ञापनपज्ञमार्फत सरकारसँग माग गरिएको बताईन् ।
ज्ञापनपत्रमा सरकारले युनियनले राखेका मागहरु पुरा गर्न आग्रह गर्दै अन्यथा नेपाल प्रेस युनियन जस्तोसुकै आन्दोलन गर्न पनि तयार रहेको चेतावनी दिईएको छ ।
ज्ञापन पत्र बुझ्दै प्रजिअ डा. घिमिरेले तत्काल फ्याक्समार्फत गृहमन्त्रालयमार्फत प्रधानमन्त्रीको कार्यालयमा पठाईने जानकारी दिए ।
