नेपाल कम्युनिष्ट पार्टी (नेकपा) धनकुटा नगर कमिटीको आयोजनामा नेपालीहरुको महान पर्व बडा दशैं, तिहार, नेपाल सम्वत्, मंसिरे चाडलगायत यो सालको सम्पूण चाडपर्वहरुको शुभकामना आदानप्रदान कार्यक्रम सम्पन्न गरेको छ ।
सो अवसरमा प्रमुख अतिथि प्रतिनिधिसभाका सांसद माननीय राजेन्द्रकुमार राईले अब नेपाली जनता हिजोको जस्तो अवस्थामा बस्नु नपर्ने बताए । उनले धनकुटा सुक्यो भनेर निरास हुनुपर्ने अवस्था नरहेको बताउँदै वर्तमान सरकारले धनकुटाको विकासका लागि किमाथांका सडक, चतरा पाँचथर सडक, भेडेटार रवी सडक निर्माण गरिरहेको बताए । उनले हिले लेगुवा सडक कालोपत्रे हुने आश्वासन दिए ।
यस्तै सांसद राईले धनकुटालाई पुनर्जीवन दिन मेडिकल कलेज सञ्चालनका लागि जग्गाको खोजी भैरहेको जानकारी दिए ।
सो अवसरमा नगर प्रमुख चिन्तन तामाङले जनताको आर्थिक अवस्था उकास्न नगरपालिकाले कृषि पर्यटनको अवधारणा ल्याएको जानकारी दिए । उनले नगरका कोहि पनि ज्येष्ठ नागरिक उपचारको अभावमा मृत्युवरण गर्न नपरोस् भनेर निःशुल्क एम्वुलेन्स सेवा उपलक्ध गराएको बताए ।
सो अवसरमा प्रमुख जिल्ला अधिकारी डा. कृष्णबहादुर घिमिरेले चाडपर्वको समयमा कुनैपनि प्रकारको अप्रिय घटना हुन नदिन प्रहरी प्रशासन सजग रहेको बताउँदै त्यसका लागि स्थानीयवासीको सहयोग आवश्यकता रहेको बताए । उनले यस्तो समयमा सडक सञ्जाल सुचारु गर्न र सुरक्षाको प्रवन्ध अनुभूति हुने गरी मिलाईएको जानकारी दिए ।
सो अवसरका पत्रकार महासंघका अध्यक्ष राजेश्वरबहादुर श्रेष्ठ र राजनीतिक दलहरुको तर्फबाट समाजवादी फोरमका प्रतिनिधि दिलकुमार राइृले शुभकामना दिएका थिए ।
नगर कमिटीका अध्यक्ष अर्जुन छाराहाङको अध्यक्षतामा सम्पन्न कार्यक्रमको सञ्चालन नगर सचिव भोगेन्द्र थापाले गरेका थिए । सो अवसरमा पूर्व सांसद गोपाल गुरागाई, दुर्गा लिंखा, जिल्ला समन्वय समितिका प्रमुख टंक चुवान, प्रहरी उपरीक्षक सुदर्शन कोईराला, सशस्त्र प्रहरी नायव उपरीक्षक सचिन कर्माचार्य, पूर्व जिविस सभापति धर्म पौडेल, पूर्व नगर उपप्रमुख जीवप्रसाद पोखरेल, विभिन्न राजनीतिक दलका प्रतिनिधिहरु, रेडक्रस सोसाईटी प्रदेश १ का अध्यक्ष नरेन्द्र पोखरेल, व्यापारी, सामाजिक संघसंस्थाका प्रमुख तथा प्रतिनिधिहरु, कर्मचारी, शिक्षक तथा नेकपाका नेता तथा कार्यकर्ताहरुको उपस्थिति रहेको थियो ।