धनकुटा । धनकुटा नगरपालिकाका प्रमुख चिन्तन तामाङले प्राकृतिक जोखिमबाट बच्न किसानहरुले कृषि तथा पशु वीमा गर्न आवश्यक रहेको बताए । सो कुरा प्रमुख तामाङले हिलेमा आयोजना गरिएको लघुवीमा सम्वन्धि देशव्यापी अभिमुखीकरण कार्यक्रमलाई सम्वोधन गर्दै बताका हुन् ।
ओरियन्टल ईन्स्युरेन्स कम्पनीको आयोजनामा भएको सो अभिमुखीकरण कार्यक्रममा उनले धनकुटा नगरपालिकाले किसानहरुलाई उत्प्रेरित गरिरहेको जानकारी गराउँदै अब कृषि वीमा पनि भएपछि किसानहरुलाई सुनमा सुगन्ध हुने धारणा राखे ।
धनकुटा नगरपालिकालाई एभोकाडोको राजधानी घोषणा गरिएको जानकारी दिदै यसले अपार सफलतासमेत पाईरहेकोले यसको वीमाका लागि अगाडि बढ्ने उनले बताए । आफुहरु अहिले एभोकाडोको सुपरजोनसमेत वनाउनेतर्फ लागेको जानकारी गराउँदै व्यावसायिक कृषकहरुले वीमा गराए जोखिमबाट सुरक्षित रहन सजिलो हुने बताए ।
कार्यक्रममा महालक्ष्मी नगरपालिका प्रमुख पर्शुराम नेपालले नेपालको आम्दानीको प्रमुख स्रोत कृषि भएको भन्दै कृषि तथा पशु वीमा सबै किसानले सुपथ र सरल तवरबाट गर्ने व्यवस्था आवश्यक रहेको बताए । उनले यसका लागि महालक्ष्मी नगरपालिका हरकिसिमको सहयोग गर्न तयार रहेको बताए ।
सो कार्यक्रममा पाख्रिवास नगरपालिकाका उपप्रमुख देवकला पौडेल तिम्सिना, पत्रकार महासंघ धनकुटाका अध्यक्ष राजेश्वरवहादुर श्रेष्ठ, उद्योग वाणिज्य संघका अध्यक्ष उमेश घिमिरेलगायत राजनीतिक दल तथा विभिन्न संघसंस्थाका प्रमुख एवम् प्रतिनिधिहरुले वीमा शुरुमा केहि गुमाएको जस्तो भएपनि प्राकृतिक प्रकोप, खडेरी तथा विभिन्न प्रकारबाट हुने जोखिमबाट बच्न सहयोगी हुने बताएका छन् ।
कार्यक्रममा लघुवीमा भन्नाले न्युन आय आर्थिक र सामाजिक कारणबाट जोखिमउन्मुख वर्गका व्यक्ति तथा समुदायलाई लक्षित गरी उनीहरुको जीवन तथा सम्पत्तिको सुरक्षाका लागि ल्याईएको वीमा रहेको जानकारी दिए । यसमा गार्हस्थ, व्यक्तिगत दुर्घटना, स्वास्थ्य, लघु व्यवसाय, गम्भीर प्रकृतीका रोग पशुधन तथा वालीनाली वीमा गर्न सकिने जनाईएको छ ।
कम्पनीका गणेश श्रेष्ठले सञ्चालन गरेको कार्यक्रमको ओरियन्टल ईन्स्योरेन्स कम्पनीका डिभिजनल म्यानेजर मानबहादुर ढकालको अध्यक्षतमा सम्पन्न भएको थिए । कार्यक्रममा तेह्थुम र धनकुटा जिल्लाका किसान, वित्तीय संस्थाहरुको सहभागिता रहेको थियो ।
