धनकुटा । स्वास्थ्य क्षेत्रमा व्यापक जनचेतना आवश्यक छ । सो कुरा धनकुटा इन्स्टिच्यूट अफ हेल्थ साईन्सले आयोजना गरेको सरोकारवाला पक्ष तथा पत्रकारसँगको अन्तक्र्रिया कार्यक्रममा सहभागीहरुले बताएका हुन् ।
इन्स्टिच्यूटका प्रवन्ध निर्देशक रामनारायण प्रसाद रामाले इन्स्टिच्यूटको अवस्थाको वारेमा जानकारी गराएका थिए । उनले स्वास्थ्य क्षेत्रमा अझै पनि जनचेतना आवश्यक रहेकोले त्यसका लागी आफु र धनकुटा इन्स्टिच्यूट अफ हेल्थ साईन्सले सहयोग गर्ने बताए । उनले विवादमा रहेको विद्यार्थी शुल्कका वारेमा प्रष्ट पार्दै तीन तीन वर्षमा शुल्क बृद्धि गर्नु पर्ने प्रावधान रहे पनि आफुले यो क्षेत्रकै कम शुल्कमा अध्यापन गरिरहेको जानकारी दिए । शुल्क निर्धारण समितिले शुल्क निर्धारण नगरेकोले अन्यौल सृजना भएको उनले जानकारी दिए ।
सो अवसरमा नेकपा धनकुटका सचिवालय सदस्य उज्ज्वल किराती, नेपाली कांग्रेसका सचिव विजयसन्तोषी राई, कोषाध्यक्ष दिनेश राई, समाजवादी पार्टीका उपाध्यक्ष पार्वती राई, राष्ट्रिय जनमोर्चाका सचिव कोपिला शंकर, धनकुटा नगरपालिका वडा नंं ३ का वडाध्यक्ष विकास घिमिरे, नेपाल पत्रकार महासंघका अध्यक्ष राजेश्वरबहादुर श्रेष्ठ, पूर्व अध्यक्ष खगेन्द्र घिमिरे, महिला अधिकारकर्मी हिमा चेम्जोङ्ग, सल्भका नायव कार्यकारी निर्देशक जयपूर्ण भुजेललगायतले मानिसका लागी स्वास्थ्य नै प्रमुख भएकाले स्वास्थ्य क्षेत्रमा राज्यले विशेष लगानी गर्नु पर्ने र निजी क्षेत्रलाई समेत लगानी गर्ने वातावरण बनाउनु पर्नेमा जोड दिएका थिए । उनीहरुले धनकुटाको आर्थिक क्रियाकलापमा इन्स्टिच्युटको ठूलो योगदान रहेको चर्चा गरे ।
कार्यक्रममा इन्स्टिच्युटका एचए कोअर्डिनेटर लिला कटुवालले इन्स्टिच्युटका वारेमा जानकारी गराएका थिए ।
सो अवसरमा प्रवन्ध निर्देशक रामाले १ नम्वर प्रदेशकै उत्कृष्ट नतिजा ल्याउन इन्स्टिच्युटले सफलता पाएको जानकारी दिए ।
