काठमाडौं बैशाख २३ गते । आठपहरिया राई समाज काठमाण्डौले राहत सामग्री वितरणगरेका छन् । सो सामग्री धनकुटाबाट काठमाण्डौ आई दैनिक ज्यालादारी मजदुरी गर्ने, बृद्धबृद्धा, एकल महिला, असक्त, असहाय तथा बिद्यार्थीहरुलाई हालको बिद्यमान लकडाउनबाट आर्थिक रूपले समस्यामा परेका परिवारलाई वितरण गरेका हुन् ।
विश्वमै त्रास फैलाईरहेको नोवेल कोरोना भाईरस संक्रमणबाट आमनागरिकहरु बचाउन सरकारले जारी गरेको लकडाउनको कारण आमनागरिक रोजगारबाट बञ्चित छन् । यस्तो अवस्थामा भोकभोकै बस्न नपरोस् भनेर दैनिक आवश्यक पर्ने खाद्य सामग्री वितरण गरिएको समाजका उपाध्यक्ष प्रेमसिंह राईले जानकारी दिए ।
वितरण गरिएको सो सामग्रीहरु यस आठपहरिया राई समाज काठमाण्डौलाई सहजकर्ता नेपाली कांग्रेस धनकुटाका कोषाध्यक्ष तथा आठपहरिया राई समाज धनकुटाका सल्लाहकार दिनेश राईमार्फत प्राप्त भएको राईले जानकारी दिए । सो सामग्रीहरु सूर्यबहादुर थापा प्रतिष्ठानका अध्यक्ष तथा पूर्वमन्त्री सुनिलबहादुर थापा, निर्माण ब्यवसायी रबिन्द्रकुमार मण्डल र दिनेश राईबाट प्राप्त भएको समाजले जनाएको छ ।
सो सामग्री समाजका अध्यक्ष प्रदिप राई, उपाध्यक्ष प्रेमसिंह राई, नेपाली कांग्रेस महाधिवेश प्रतिनिधि उदय लिम्बु, नेपाली कांग्रेस धनकुटा काठमाडौं सम्पर्क समितिका अध्यक्ष भिमबहादुर थापा, नेपाल विद्यार्थी संघ धनकुटा काठमाडौ. सम्पर्क समितिका अध्यक्ष सविन पोखरेललगायतले वितरण गरेका थिए । राहत ३० परिवारलाई वितरण गरिएको अध्यक्ष प्रदिप राईले जानकारी दिए ।
सो राहत सामग्री सम्बन्धित व्यक्तिहरुको निवासमा ढुवानीका लागि नेपाली कांग्रेस धनकुटाका महासमिति सदस्य घनेन्द्र श्रेष्ठले व्यवस्था गरेको जनाएको छ ।
