धनकुटा १९ । दुई कम्युनिष्ट पार्टी नेकपा एमाले र नेकपा माओवादी केन्द्रबीच गत प्रतिनिधिसभा निर्वाचनताका सैद्धान्तिक रुपमा पार्टी एकीकरण गर्ने गरी निर्वाचनमा सहकार्य गरिएको थियो । त्यहि सहकार्यकै कारण झण्डै दुईतिहाई बहुमत ल्याउन सफल पनि भए ।
निर्वाचन भएको र एकता भई बनेको नेपाल कम्युनिस्ट पार्टी (नेकपा) बनेको लामो समयपछि स्थानीय तहसम्म एकता सम्पन्न भएको छ । एउटै पार्टी बनेको १० महिनापछि बल्ल धनकुटामा स्थानीय तहमा एकता भएको हो ।
यसै क्रममा नेपाल कम्युनिष्ट पार्टी (नेकपा) धनकुटाको सात वटै स्थानीय तहमा गठन भएको नयाँ समितिका पदाधिकारी तथा सदस्यहरुले सपथ लिएका छन् । पार्टी केन्द्रियसदस्य तथा पूर्व सांसद हेमराज भण्डारीलगायत प्रदेश कमिटी सदस्यहरुले सात वटै स्थानीय तहमा सपथ गराएका हुन ।
जिल्लका ३ नगरपालिका र ४ गाउँपालिकामा पूर्व एमालेले २ नगरपालिका र ३ गाउँपालिकाको र साविक माओवादी केन्द्रले १ नगरपालिकार र १ गाउँपालिकाको नेतृत्व पाएको छ । साविक एमालेले धनकुटा नगरपालिका, पाख्रीवास नगरपालिका, साँगुरीगढी गाउँपालिका, छथर जोरपाटी गाउँपालिका र शहिदभुमि गाउँपालिकाको नेतृत्व गरेको छ भने महालक्ष्मी नगरपालिका र चौबिसे गाउँपालिकाको नेतृत्व पूर्व माओवादी केन्द्रले पाएको छ ।
नयाँ नेतृत्व पाउनेहरुमा धनकुटा नगर अध्यक्षमा अर्जुन छाराहाङ र सचिवमा खगेन्द्र विष्ट, पाख्रीवास नगर अध्यक्षमा शान्तिराम गौतम र सचिवमा मुक्ति बजगाँई, साँगुरीगढी गाउँपालिका अध्यक्षमा देवमान राई र सचिव जगत राई, छथर जोरपाटी गाउँपालिका अध्यक्षमा इन्द्र सारुमगर र सचिवमा ज्ञानेन्द्र कार्की र शहिदभुमि गाउँपालिका अध्यक्षमा निरबहादुर राई र सचिवमा मातृका राई रहेका छन् । त्यस्तै पूर्व नेकपा माओवादी केन्द्रले नेतृत्व गरेका स्थानीय तहहरुमा महालक्ष्मी नगर अध्यक्षमा प्रेमबहादुर खड्का र सचिवमा विष्णुप्रसाद दाहाल तथा चौबिसे गाउँपालिका अध्यक्षमा इन्द्रबहादुर खत्री र सचिवमा राजकुमार चेम्जोङलाई चयन गरिएको छ ।
पार्टीको स्थानीय तह परिचालनको लागि इन्चार्ज भने जिल्ला नेतृत्व निर्माण भएपछि मात्र तोकिने नेकपाको केन्द्रिय सदस्य हेमराज भण्डारीले जानकारी दिए ।
