धनकुटा भदौं ७ । जिल्लामा कोरोना भाईरसको संक्रमण बढेसँगै छथरजोरपाटी गाउँपालिकाले आजबाट लागू हुने अत्यावश्यकीय सेवा बाहेका सबै सेवा बन्द गर्ने निर्णय गरेको छ । कोरोना भाइरस समुदायस्तरमा फैलिन सक्ने खतरा देखिएकोले आगामी भदौं १३ गते राती १२ वजेसम्मका लागि सेवा बन्द रहने गरी गाउँपालिकाले निर्णय लिएको गाउँपालिकाका अध्यक्ष शेरबहादुर लिम्बुले जानकारी दिए ।
सो निर्णय गाउँपालिकास्तरीय कोभिड १९ प्रकोप व्यवस्थापन केन्द्र (सीसीएमसी) को बैठकको गरेको हो । निर्णयअनुसार अत्यावश्यकीय सेवाहरु स्वास्थ्य सेवा, एम्बुलेन्स, विद्युत्, खानेपानी, टेलिकम, हुलाक र खाद्यवस्तु बेचविखन रहेको छ ।
सो निर्णयअनुसार विदेशबाट आउनेहरुलाई अनिवार्य क्ववारेन्टाईनमा राख्ने र अन्य जिल्लाबाट आउनेहरुले होम क्वारेन्टाईन राखिने छ । उनीहरुको पीसीआर परिक्षण गरी नेगेटिभ आएभनेमात्र छाड्ने निर्णय भएको अध्यक्ष लिम्बुले जानकारी दिए ।