धनकुटा । पाख्रिवास नगरपालिका वडा नं ५ दियालेका आशिष मगर वेपत्ता भएको एक महिना वित्न लाग्दा समेत अझै भेटिएका छैनन् ।
गतफागुन २० गते शिवरात्री दिन घरवाट निस्किएका मगर हालसम्म पनि घर नआएका उनका भिनाजु टिका भूजेलले बताए ।
भिनाजु भूजेलका अनुसार शिवरात्रीको दिन विहानभरि घरमा काम गरेर दिउँसो तीन बजे दोकान तिर जान्छु भन्दै हिडेका थिए । तीन दिनसम्म घर नआएपछि परिवारले इलाका प्रहरी कार्यालय पाख्रिवासमा खोजीतलासको लागि उजुरी दिएका थिए ।
उजुरी दिएपनि प्रहरीले खोजीतलासमा खासै चासो नदिएको उनका भिनाजु भूजेलले आरोप लगाए । यता इलाका प्रहरी कार्यालय पाख्रीवासका इञ्चार्ज प्रेमबहादुर कार्कीले भने उजुरी आएको दिननै जिल्ला कार्यालयमा पठाइएको बताए । उनले भने ‘जिल्ला कार्यालयमा वुझ्दा खोजी कार्य भइरहेको जानकारी आफूले पाएको छु । सबैतिरबाट खोजीकार्य हुँदैछ’
परिवारले पनि आफ्नै सक्रियतामा विभिन्न स्थानमा गएर खोजीकार्य गरिरहेको छ र पाख्रिवास आसपासका विभिन्न स्थानका साथै छिमेकी जिल्ला भोजपुरको सानो दुम्वा, ठूलो दुम्वा, सदरमुकाम, प्याउली, हिलेभञ्ज्याङ्गको जंगल, जरायोटार लगायतका स्थानमा गएर खोजी कार्य गरिरहेको भिनाजुले बताए ।
