धनकुटा । ६२ औं राष्ट्रिय सहकारी दिवस विविध कार्यक्रमसहित सम्पन्न भएको छ । जिल्ला सहकारी संघद्वारा धनकुटामा आयोजित कार्यक्रममा प्रमुख अतिथि तथा सहकारी महासंघका केन्द्रिय सदस्य शिव डागीले सरकारको ३ खम्वे नीतिमा सहकारीलाई समेट्नुले सहकारीलाई सरकारले महत्व दिएको जानकारी दिए । उनले अहिले अहिले समय परिवर्तन भैसकेकोले पहिलेको जस्तो सानो पुँजीको सहकारीको काम नभएको जिकिर गरे । उनले कम्तिमा पनि पाँच करोडको पुँजी आवश्यक रहेको बताउँदै सानासाना सहकारीहरु मर्ज गर्न सुझाव दिए । उनले सरकारको सुखी नेपाली समृद्ध नेपाल नारालाई सार्थक बनाउन सहकारीहरुले उत्पादनमूलक क्षेत्रमा लगानी गर्नु पर्ने बताए ।
सो अवसरमा धनकुटामा क्रियाशील ३ सय १० वटा सहकारी मध्य उत्कृष्ठ सेवा प्रदान गरेको भन्दै पाख्रिवास नगरपालिकाका साना किसान कृषक सहकारी संस्थालाई पुरस्कृत गरियो । यस्तै उत्कृष्ठ व्यवस्थापकमा महिला उद्यमी सहकारी संस्थाका व्यवस्थापक हिमा निरौला र प्रभातफेरी कार्यक्रममा उत्कृष्ठ सहभागीताका लागि सहयोगी बचत तथा ऋण सहकारी संस्था धनकुटा ६ लाई पुरस्कृत तथा सम्मानित गरेको छ । पुरस्कार तथा सम्मान प्रमुख अतिथि डाँगी, जिल्ला सहकारी संघका अध्यक्ष सुन्दरवाबु श्रेष्ठ, घरेलु तथा साना उद्योग महासंघका अध्यक्ष विजयसन्तोषी राई, नेपाल पत्रकार महासंघका अध्यक्ष राजेश्वरबहादुर श्रेष्ठ र साझा सञ्चारका अध्यक्ष भेषराज कटेलले प्रदान गरेका थिए ।
जिल्ला सहकारी संघका अध्यक्ष सुन्दरबाबु श्रेष्ठको अध्यक्षतामा संम्पन्न कार्यक्रममा कार्यपत्र जिल्ला सहकारी संघ धनकुटाका अध्यक्ष सुन्दरबाबु श्रेष्ठले प्रस्तुत गरेका थिए । सो अवसरमा घरेलु महासंघका अध्यक्ष राई, पत्रकार महासंघका अध्यक्ष श्रेष्ठ, साझा सञ्चार नेपालका अध्यक्ष कट्ेलले स्वरोजगारीका लागि सहकारीले अवसर सृजना गर्नुपर्ने बताएका थिए । उनीहरुले सहकारी अभियानलाई ग्रामीण क्षेत्रसम्म संचालन गर्नु पर्नेमा जोड दिएका थिए ।
कार्यक्रममा स्वागत मन्तव्य जिल्ला सहकारी संघका सदस्य रेणु श्रेष्ठले र संचालन कोषाध्यक्ष सावित्री श्रेष्ठले गरेकी थिईन । कार्यक्रम शुरु हुनु पूर्व टुडिखेलबाट शुरु भएको प्रभातफेरीले बजारको विभिन्न भागहरुको परिक्रममा गरी स्थानीय होटल सुरभीमा कार्यक्रम आयोजना गरि एको थियो ।