धनकुटा २१ चैत्र ।
जिल्लामा स्थानीय तहले राम्रो काम गरेमा सहयोग र जनविरोधी काम गरे विरोध गर्नेगरी नेकपाबाहेक सबै दल संगठित भएका छन् । स्थानीय तहमा नेकपा एकलौटी रुपमा अन्य दलहरुसँग समन्वय नगरी बहुमतको आडमा आफुखुसी कार्यकर्ता पोस्नेगरी निर्णय गर्दै गएको भन्दै भण्डाफोर गर्न जनस्तरसम्म अभियान संचालन गर्ने सर्वदलीय बैठकले निर्णय गरेको छ ।
सो सर्वदलीय बैठकमा पूर्वमन्त्री तथा राप्रपा संयुक्तका नेता सुनिलबहादुर थापाले अहिलेको वर्तमान सरकार २ तिहाईको दम्भले अधिनायकवाद शैलीमा अगाडि बढ्न थालेको आरोप लगाए । उनले सरकारलाई लोकतान्त्रिक ढंगले हिडाउन पनि लोकतन्त्रवादी शक्ति एक ठाउँमा हुनु पर्ने बताए । उनले पछाडि पर्दै गएको धनकुटाको पुरानै अवस्थामा ल्याउनुका साथै विकास र समृद्धीका लागि आफु क्रियाशील भैरहने बताए ।
नेपाली कांग्रेसका पूर्व सभापति तथा पूर्व सांसद मनोहरनारायण श्रेष्ठको अध्यक्षतमा भएको संयुक्त बैठकमा राप्रपा संयुक्तका नेता थापा, संघीय समाजवादी फोरम नेपालका अध्यक्ष बलबहादुर राई, राष्ट्रिय जनमोर्चा नेपालका अध्यक्ष तुलमान राई, नयाँ शक्ति पार्टीका नेता तथा धनकुटा नगरपालिका वडा नं. ३ का वडाध्यक्ष विकास घिमिरेले धारणा राखेका थिए । बैठकले लोकतन्त्र आए पछि जिल्लाको विकास निर्माणमा दलिय एकता र समन्वयबाट हुदै आएकोमा अहिले नेकपाले त्यसलाई तोड्दै अधिनाकवादशैलीमा एक्लै हिड्न थालेको आरोप लगाए । बैठकले दलीय अस्तित्वलाई आत्मसाथ गर्दै लोकतान्त्रिक आचरणअनुसार दलीय समन्वयलाई थप मजबुत पार्न नेकपालाई आग्रह समेत गर्ने निर्णय गरेको कांग्रेस सचिव विजयसन्तोषी राईले जानकारी दिए । सो बैठकले सबै स्थानीय तह, सरकारी तथा सरोकारवाला निकायहरुलाई लोकतान्त्रिक आचरणअनुसार राजनीतिक दलहरुको भूमिका स्वीकार गर्न आग्रह गर्ने निर्णय गरेको छ ।
संयुक्त बैठकमा दलका प्रमुखका साथमा कांग्रेसका सचिव राई, फोरमका सहसचिव डम्वर कटुवाल, राप्रपा संयुक्तका मदन घिमिरे, कांग्रेसका जिल्ला सदस्य रविन्द्र नेपालीलगायतको उपस्थिति रहेको थियो ।
