धनकुटा । प्रत्येक वर्ष रामनवमीका दिन हिलेमा रामनवमी मेला लाग्दै आएको छ । सोहि मेलाको अवसरमा गतवर्षदेखि हिले खाना महोत्सव आयोजना हुदैछ । यसपटक शुरु भएको दोस्रो खाना महोत्सवमा सितारामको रथयात्रा पनि आयोजना गरियो ।
हिले पर्यटन प्रवद्र्धन तथा पूर्वाधार विकास संस्था र क्षेत्रीय होटेल एसोशिएसन नेपालको संयुक्त आयोजनामा शुरु भएको छ । सो खाना महोत्सवमा जातीय तथा स्थानीय खानाका परिकार, स्थानीय अग्र्यानिक खानाका तथा फलफुलको परिकार राखिएको हिले पर्यटन प्रवद्र्धन तथा पूर्वाधार विकास संस्थाका अध्यक्ष खगेन्द्र विष्टले जानकारी दिए ।
महोत्सव चार दिनसम्म सञ्चालन हुने आयोजकले जानकारी दिए । महोत्सवको एक कार्यक्रमका बीच प्रतिनिधि सभा सदस्य राजेन्द्र राईले उद्घाटन गरेका छन् । सो अवसरमा प्रमुख अतिथि राईले नेपालको प्रमुख आम्दानीको स्रोत पर्यटन भएकोले पर्यटन प्रवद्र्धनका लागि यस्ता महोत्सवहरुको ठूलो भूमिका रहने बताए । उनले हिले प्रदेशकै प्रमुख पर्यटकीय केन्द्र बन्दै गएको जानकारी दिए ।
सो अवसरमा प्रदेश सभा सदस्य निरन राई, जिल्ला समन्वय समितिका प्रमुख टंक चुवान, धनकुटा नगरपालिकाका प्रमुख चिन्तन तामाङ, उद्योग वाणिज्य संघका उपाध्यक्ष तारा तितुङ, आदिवासी जनजाति महासंघका अध्यक्ष सञ्जयसन्तोषी राईलगायतले महोत्सवको सफलताका लागि शुभकामना दिएका थिए ।
यसैबीच राम नवमीकै अवसरमा हिलेमा रथ यात्रा समेत गराइएको छ । प्रत्येक बर्षझै यो वर्ष पनि रामनवमीको अवसरमा रथ यात्रा गराइएको हो । स्थानीय षडेश्वर महादेवको मन्दिरबाट हनुमान सहितको सीतारामको रथ यात्रा हिले बजारका विभिन्न भागको परिक्रममा गरिएको छ । हिलेमा रामनवमीको अवसरमा हरेक वर्ष लाग्ने मेलालाई थप आकर्षक बनाउन विगत चार वर्षबाट रथयात्रा गराउन सुरु गरिएको हो ।
