धनकुटा । धनकुटा नगरपालिका क्षेत्रका सहिद तथा बेपत्ता परिवार र घाईतेहरुलाई सहिद सरोकार समाज धनकुटाले सम्मान गरेको छ । समाजले पञ्चायतविरुद्ध भएको प्रजातान्त्रिक आन्दोलनदेखि माओवादी विद्रोह हुदै गणतन्त्र स्थापनाका क्रममा सहादत प्राप्त गरेका, बेपत्ता भएकाहरुको परिवार र सो क्रममा घाईते भएका नगर क्षेत्रका परिवार र घाईतेलाई सम्मान गरेका हुन् । यसरी सम्मानित हुनेहरुको संख्या १६ जना रहेका थिए ।
कार्यक्रममा सम्मानित हुनेहरुमा सहिद भीमनारायण श्रेष्ठ, डगलसिंह लिम्बु, दिपक दाहाल, गंगाबहादुर जोशी, पदमबहादुर श्रेष्ठ, चितकुमार राई, नगेन्द्र बास्तोला, राजेश थापा मगर, नगेन्द्र प्रसाद राई, आसबहादुर राई र बेपत्ता भएका सुन्दर कुमार श्रेष्ठका परिवार तथा आफन्तजनलाई दोसल्ला ओढाई सम्मान गरिएको थियो । यसैगरी घाईते तारादेवी पिठाकोठेमगर, दलबहादुर राईलाई पनि सम्मानित भएको थिए । सहिद तथा बेपत्ता भएकाहरुको परिवार र घाईतेहरुलाई प्रतिनिधि सभाका सांसद राजेन्द्र राई, प्रदेश सभाका सांसद निरन राई, समाजका अध्यक्ष तिलक प्रसाद राई, नेकपाका कार्यालय सचिव नैन विश्वकर्मा, नेपाली कांग्रेसका सचिव विजयसन्तोषी राई, नेपाल पत्रकार महासंघका अध्यक्ष राजेश्वरबहादुर श्रेष्ठ लगायतले सहिद सरोकार समाजको तर्फबाट दोसल्ला ओढाई सम्मान गरेका थिए । सम्मान सहिद भिमनारायण श्रेष्ठकी पत्नी लक्ष्मीदेवी श्रेष्ठलगायत परिवारजनलाई गरेका थिए ।
कार्यक्रममा प्रतिनिधि सभा सदस्य राजेन्द्र राईले सहिदहरुकै बलिदानीबाट मुलुकमा गणतन्त्र आएकोले राज्यले सहिद तथा बेपत्ता परिवारजनलाई उचित क्षतिपूर्तिसहित सम्मान गर्नुपर्ने बताए । कार्यक्रममा प्रदेश सभा सदस्य निरन राई, नेकपाका प्रतिनिधि पार्टी कार्यालय सचिव विश्वकर्मा, कांग्रेस सचिव राई, पत्रकार महासंघ सभापति श्रेष्ठ, समाजका अध्यक्ष राईलगायतले पीडित परिवारजनलाई राज्यले उचित सम्मान गर्दै जीविकोपार्जनका लागि व्यवस्था गर्नु पर्ने बताए । उनीहरुले अब देशमा सबैप्रकारको अधिकार स्थापित भएकोले इमान्दारिताका साथ सहिदहरुले देखाएको बाटोबाट हिड्नु पर्नेमा जोड दिए ।
सो अवसरमा कार्यपत्र सहिद सरोकार समाज धनकुटका अध्यक्ष तिलक प्रसाद राईले कार्यपत्र प्रस्तुत गरेका थिए । उपाध्यक्ष अमर तिवारीले स्वागत मन्तव्य र कार्यक्रमको संचालन स्मिता निरौलाले गरेकी थिईन ।
कार्यक्रममा सहिद परिवारका तर्फबाट कृष्णगोविन्द चेम्जोङले सहिद र घाईते परिवारहरुको राज्यले अपमान र वेवस्ता गरिरहेको आरोप लगाए ।
धनकुटा जिल्ला अन्य ६ वटा स्थानीय तहहरुमा पनि सम्मान कार्यक्रम आयोजना गरी ति क्षेत्रका सहिद तथा बेपत्ता परिवार र घाईतेहरुलाई सम्मान गर्ने सहिद सरोकार समाजका अध्यक्ष तिलक प्रसाद राईले जानकारी दिए ।
