धनकुटा । क्यामरुन टोली डाउफिन्स फुटवल क्लवले धरान फुटवल क्लव माथि फराकिलो जित हासिल गर्दै भीमनारायण गोल्डकपको सेमिफाइनलमा प्रवेश गरेको छ ।
धनकुटा–५ तल्लो टुडिखेलमा सोमवार भएको खेलमा डाउफिन्सले धरान फुटवल क्लवलाई शून्यका विरुद्ध ५ गोलअन्तरले पराजित गर्दै सेमिफाइनलमा प्रवेश गरेको हो ।
डाउफिन्सको जितमा यानिक वो आना र कोनोले २/२ गोल तथा पेटंगाले एक गोल गरेका थिए । सुरुवातदेखि नै डाउफिन्सले धरानलाई दवावमा राखेको थियो ।
खेलको ६ औं मिनेटमा यानिक वो आनाले गोल गर्दै सुरुवाती अग्रता दिलाए । उनले नै पूनः ३० औं मिनेटमा अर्को गोल थप्दै अग्रता दोब्बर बताए । त्यस्तै ५० औं मिनेटमा पेटंगाले गोल गर्न सफल भए । ६१ र ८६ औं मिनेटमा गोल गर्दै कोनोले आफ्नो टिमको जीत सुनिश्चित गरेका थिए । धरानका खेलाडीले पनि केही राम्रा अवसर पाए पनि सदुपयोग गर्न सकेनन् ।
आज सम्पन्न खेलको म्यान अफ द म्याच डाउफिन्सका कप्तान अउरेल इनामे घोषित भए । उनलाई नगद ५ हजार रुपैयासँगै मेडल धनकुटा नगरपालिकाका प्रमुख चिन्तन तामाङले प्रदान गरे ।
खेलपछि संक्षिप्त प्रतिक्रिया राख्दै डाउफिन्सका टिम म्यानेजर आशिक थापा मगरले खेलाडी वीचको उत्कृष्ट तालमेलको कारण जित हासिल भएको बताए । उनले उपाधी जित्ने लक्ष्य सहित आएको बताए । त्यस्तै धरान फुटवल क्लवका प्रशिक्षक सागर घिमिरेले डाउफिन्सका खेलाडीहरु शारिरीक रुपमा बलियो भएपनि आफ्नो टिमका खेलाडीले राम्रो प्रदर्शन गरेको बताए ।
मंगलवार प्रतियोगिताको अन्तिम क्वाटर फाइनल खेलमा ए डिभिजन क्लव सशस्त्र प्रहरी क्लव (एपिएफ) र फेन्ड्रस् क्लव वीच हुनेछ । १४ औं संस्करणको विजेताले नगद चार लाख र ट्रफि, उपविजेताले दुई लाख र ट्रफि हात पार्नेछन् ।