धनकुटा । १३ औं संस्करणको उपविजेता झापाको विर्तामोड युनाइटेड क्लव धनकुटामा जारी १४ औं संस्करणको सहिद भीमनारायण गोल्डकपको सेमिफाइनलमा प्रवेश गरेको छ ।
सदरमुकामस्थित तल्लो टुडिखेलमा सोमवार सम्पन्न दोस्रो क्वाटरफाइनल खेलमा आयोजक धनकुटालाई ७–० को फराकिलो गोलअन्तरले पराजित गर्दै झापाको विर्तामोड युनाटेड क्लव सेमिफाइनल पुग्ने दोस्रो टिम वन्न सफल भएको हो ।
यसअघि आइतवार सम्पन्न उद्घाटन खेलमा भारतको रोयल एफसीलाई सदनडेथमा पराजित गर्दै मोरङको विन्ध्यावासिनी क्लव सेमिफाइनल पुगिसकेको छ ।
झापाको जितमा विकेश लिम्बुले ह्याट्रिक पुरा गरे । त्यस्तै मनिस थापाले दुई, राजकुमार कन्दङ्वा र एञ्जेल गुरुङले एक÷एक गोल गरे ।
एकपक्षिय खेलमा पहिलो हाफ देखि नै आयोजक धनकुटालाई झापाले लगातार दवावमा राखेको थियो । पहिलो हाफमा नै झापाले धनकुटा विरुद्ध दुई गोलको अग्रता बनाएको थियो । दोस्रो हाफमा एक पछि अर्को दवाव सिर्जना गर्दै पाँच गोल गर्न सफल भयो । आयोजक धनकुटाले घरेलु मैदान र दर्शकको साथ पाएपनि त्यसको फाइदा उठाउन सकेन ।
खेल सुरु भएको ९ औं मिनेटमा गोल गर्दै मनिषले झापालाई सुरुवाती अग्रता दिलाए । त्यस्तै झापाकै विकेशले खेलको ३६ औं मिनेटमा दर्शनीय गोल गर्दै अग्रता दोब्बर बनाए । उनले डिवक्स एरिया भित्रवाट विपक्षी गोलकिपरलाई विट गर्दै सुन्दर गोल गरे ।
दोस्रो हाफमा पनि झापाले आयोजक धनकुटालाई निरन्तर दवावमा राख्न सफल भयो । पूनः विकेशले नै ५६ औं मिनेटमा गोल गरे । उनले ८७ औं मिनेटमा पून अर्को गोल थप्दै ह्याट्रिक पुरा गरे । झापाका एञ्जल गुरुङले ६२ औं र राजुकुमार कन्दङ्वाले ९१ औं र मनिष थापाले ९२ औं मिनेटमा गोल गर्दै जीत सुनिश्चित गरे ।
झापाको निरन्तर दवावको वाजजुद पनि आयोजक धनकुटाका खेलाडीले केही राम्रा अवसर सिर्जना गर्दै गोल गर्ने प्रयास गरेका थिए । पहिलो हाफमा धनकुटाका इनाम तामाङ, सञ्जय रम्तेल गोल गर्नवाट चुकेका थिए । उनीहरुको प्रयास गोलपोष्ट माथिवाट वाहिरिएको थियो ।
आज सम्पन्न खेलको म्यान अफ दी म्याच ह्याट्रिककर्ता झापाका विकेश लिम्वु घोषित हुँदै ५ हजार जित्न सफल भए । झापा १३ औं संस्करणको भीम नारायण गोल्डकपको उपविजेता समेत हो ।उनलाई निगाले सिमेन्टका सञ्चालक दिनेश पौडेलले पुरस्कार प्रदान गरेका थिए ।
खेलपछि प्रतिक्रिया दिँदै झापाका प्रशिक्षक सन्तोष राईले आजको जीतलाई खेलाडी विच तालमेल र मेहनतले हासिल भएको बताए ।
‘४ गोलले जित्छौं जस्तो लागेको थियो । निरन्तरको दवावले स्कोर वढ्यो’ उनले भने ‘गतवर्ष उपविजेतामा चित्त वुझाएको थियौ । यो पटक उपाधी जित्ने लक्ष्य लिएर आएका छौं । जित्नेमा विश्वस्त छौं ।’ आयोजक धनकुटाका प्रशिक्षक सरिन प्रधानले खेलाडी विच तालमेल नहुँदा पराजय भोग्नु परेको बताए । यही टोलिले तीन दिन अघि वसन्तपुरमा सम्पन्न प्रदेश स्तरीय फुटवल प्रतियोगितामा उपविजेता भएको थियो ।
साेमवार नाइजेरियन टोली डाउफिन्स क्लव र धरान फुटवल क्लव वीच हुने आयोजक समितिका महासचिव रोशन श्रेष्ठले बताए ।
१४ औं संस्करणको विजेताले नगद ४ लाख र ट्रफि, उपविजेताले २ लाख र ट्रफि आयोजक समितिका संयोजक शम्भु प्रधानले बताए ।