धनकुटा । धनकुटा नगरपालिका वडा नं. ३ का वडाध्यक्ष विकास घिमिरेले आफुले पाउँदै आइरहेको सेवासुविधा बापतको रकम एक सामुदायिक विद्यालयलाई प्रदान गरेका छन् ।
सोही वडाको स्याउलेमा रहेको ज्वालादेवी प्राथमिक विद्यालयलाई अहिलेसम्म पाएको झण्डै दुई बर्ष वरावरको तलव–भत्ता बापतको रकम सहयोग गरेका हुन् ।
विद्यालयको भौतिक पूर्वाधारको मर्मत सभ्भार तथा कक्षा कोठा व्यवस्था, रंगरोगन गर्दा ३ लाख १८ हजार खर्च भएको थियो । उक्त रकम तिर्न कतैबाट आर्थिक स्रोत नजुट्दा विद्यालयलाई ऋण लाग्यो । जसकारण उनले आफुले पाउँदै आइरहेको सेवा सुविधा वापतको सबै रकम विद्यालयलाई प्रदान गरि ऋण र्तिन सहयोग गरेको बताए । उनले भने ‘वालवालिकालाई विद्यालयमा गएर पढ्न अभिप्रेरण जगाउने उद्देश्यले सेवा सुविधा बापत पाउने रकम विद्यालयलाई उपलव्ध गराएको हुँ’
नगरपालिकाबाट वडाध्यक्षले मासिक सेवा सुविधा बापत १३ हजार ८ सय रुपैया पाउने व्यवस्था छ । वडाध्यक्ष घिमिरे यस विद्यालयका पूर्वविद्यार्थी समेत हुन् । उनले यस विद्यालयमा प्राथमिक तहसम्म अध्ययन गरेका थिए । घिमिरेले विभिन्न दाताहरुबाट सहयोग जुटाएर यस विद्यालयको शैक्षिकस्तर उकास्न निरन्तर पहल समेत गरिरहेका छन् । सानो प्रयासले विद्यालयको शैक्षिकस्तरमा धेरै सुधार भएको उनी बताउँछन् ।
जसको कारण अहिले शैक्षिक सुधार भएसँगै यस विद्यालयमा विद्यार्थीको संख्या वढ्न थालेको छ । कुनै वेला विद्यार्थी अभावले अन्य विद्यालयसँग मर्ज हुने स्थितिमा पुगिसकेको यो विद्यालयमा अहिले ४४ जना विद्यार्थी अध्ययनरत छन् ।
गतशैक्षिक सत्रसम्म १३ जना विद्यार्थी भर्ना भएका थिए । तर अहिले विद्यालयमा नयाँ व्यवस्थापन तथा अंग्रेजी माध्यमबाट पठनपाठन भएको कारणले यसपटक भने विद्यार्थी वढेर ४४ जना पुगेका छन् । यो संख्यालाई आगामी वर्षमा वढाउने लक्ष्य लिइएको विद्यालयका शिक्षिक विमला वाग्लेले बताइन् ।
सामुदायिक विद्यालय भए पनि यस विद्यालयको अंग्रेजी माध्यमबाट पठन पाठन हुन्छ । विद्यार्थीलाई आवश्यक पर्ने पोशाक, स्टेशनरी, टिफिनकारि लगायत सामाग्रीको व्यवस्था धनकुटा–१० पारिपात्ले तिल्केचौर निवासी समाजसेवी वलराम कार्कीले जुटाएका हुन् ।सबै विद्यार्थीहरुले ती सामाग्रीहरु निःशुल्क रुपमा पाएका छन् । वडाध्यक्ष घिमिरेकै पहलमा अहिले विद्यालय वरिपरि तारघेरावारको काम धमाधम भइरहेको छ ।
