धनकुटा ८ जेष्ठ । धनकुटा उद्योग बाणिज्य संघले जिल्लामा कोरोना भाईरसबाट बचाउन सुरक्षित तथा स्वास्थ्य सामग्री वितरण अभियानलाई तीव्रता दिएको छ । संघले जिल्लाका प्राय सबै स्थानीय तह, जनतासँग प्रत्यक्ष सरोकार राख्ने कार्यालय, फ्रन्टलाईनमा कार्य गर्ने स्वास्थ्यकर्मी, व्यवसायी, सञ्चारकर्मी, प्रहरी, एम्बुलेन्स चालक, मजदुरलगायतलाई यस्ता सामग्री वितरण गर्दै आएको छ ।
यसैक्रम आज संघले उच्च अदालत विराटनगर धनकुटा इजलास र जिल्ला अदालतलाई यस्ता सामग्री प्रदान गरेको छ । धनकुटामा पन कोरोना संक्रमित देखिएपछि उच्च जोखिम बढेको भन्दै बाणिज्य संघले न्यायालयमा न्यायका लागी नागरिकहरु आउने भएकाले स्वास्थ्य तथा सुरक्षित सामग्रीहरु प्रदान गरेको संघका अध्यक्ष विजयसन्तोषी राईले जानकारी दिए ।
उच्च अदालत इजलासका मुख्य न्यायाधीश नीता दिक्षित गौतमको उपस्थितिमा रजिष्ट्रार शम्भुप्रसाद बराललाई प्रदान गरेका थिए । यस्तै जिल्ला अदालतका स्रेष्तेदार तथा शाखा अधिकृत राजन बास्तोलालाई ती सामग्रीहरु संघका अध्यक्ष विजयसन्तोषी राई, उपाध्यक्ष निर्मला राई श्रेष्ठ, कोषाध्यक्ष रुपेश श्रेष्ठ प्रदान गरेका थिए ।
सो अवसरमा उच्च अदालतका मुख्य न्यायाधीश नीता दिक्षित गौतमले बाणिज्य संघलाई सामग्री प्रदान गरेकोमा धन्यवाद दिदै उक्त सामग्रीहरु अदालतमा सेवा लिन आउनेहरुलाई प्रदान गर्ने वताईन । सो अवसरमा संविधान सभा सदस्य अधिवक्ता दुर्गा लिंखा राई, जिल्ला अदालत वार एशोसिएसनका अध्यक्ष हिमा देवी वस्नेत भट्टराई, उच्च अदालतका रजिष्ट्रार शम्भुप्रसाद वराल, जिल्ला अदालतका से्रष्तेदार राजन वास्तोला लगायतले बाणिज्य संघले विभिन्न संघसंस्था तथा कार्यालयहरुलाई यस्ता स्वास्थ्य तथा सुरक्षित सामग्रीहरु वितरण गर्दै आएकोमा प्रशंसा गर्दै धन्यवाद दिएका थिए ।
बाणिज्य संघले उच्च अदालतलाई दुई थान पीपीई, हेण्ड वास, पञ्जा, सेनिटाईजर, मास्क, हात धुनका लागी पानी राख्ने धारा सहितको बालटिन प्रदान गरेका थिए । यस्तै जिल्ला अदालतलाई सेनिटाईजर, मास्क, हेण्ड वास, पञ्जा, हात धुनका लागी धारासहितको पानी राख्ने बालटिन प्रदान गरिएको संघका कोषाध्यक्ष रुपेश श्रेष्ठले जानकारी दिए ।
यस अघि दुवै अदालतलाई जिल्ला अदालत बार एशोसिएसनले मास्क र सेनिटाईजर प्रदान गरेको जिल्ला बारका अध्यक्ष हिमा देवी बस्नेत भट्टराईले जानकारी दिईन् ।