धनकुटा २० असोज । बसपार्कस्थित व्यापारिक भवनको साढे पाँच महिना भन्दा बढीको घरभाडा छुट गरेकोमा धनकुटा नगरपालिकाका प्रमुख चिन्तन तमाङलाई नगरपालिकालाई सम्मान गरेको छ । सो सम्मान व्यापारीहरुको तर्फबाट धनकुटा उद्योग बाणिज्य संघका अध्यक्ष विजयसन्तोषी राईलगायतले गरेका हुन् ।
कोरोना भाईरस नियन्त्रण गर्न सरकारले गतवर्षको २०७६ चैत्र ११ गतेदेखि २०७७ भाद्र मसान्तसम्म पाँच महिना २० दिनको लकडाउन लगाएको थियो । सो अवधीको सटर भाडा लगभग १२ लाख जति धनकुटा नगरपालिकाले छुट गरेका थिए ।
सो अवसरमा संघका अध्यक्ष राई, नेपाल पत्रकार महासंघका अध्यक्ष राजेश्वरबहादुर श्रेष्ठ, संघका वरिष्ठ उपाध्यक्ष मनकुमारी तितुङ, उपाध्यक्ष निर्मला राई, महासचिव रामबहादुर गोङ्वा, कार्यकारी सदस्यहरु अम्विका धमला, सुनिता तामाङ, कर्मचारी मुकेश राई सहभागी थिए ।
यस्तै नगरपालिकाले १२ लाख जतिको हटिया, पार्किङ्गलगायत ठेक्का पनि छुट दिएको राजश्व अधिकृत राजु गुरागाईले जानकारी दिए । यस्तै व्यवसाय कर र घर बहाल करमा २५ प्रतिशत छुटदिएको छ । यसका साथै सरसफाई करमा २० प्रतिशत छुट गरेको अधिकृत गुरागाईले जानकारी दिए ।
सो अवसरमा संघले भाडा छुट गरी व्यवसायीहरुलाई ठूलो सहयोग गगरेको भन्दै प्रमुख तामाङसहित नगरपालिका परिवारलाई धन्यवाद दिए । संघले कर शिक्षा संचालन गर्न नगरपालिकासँग सहयोग गर्न आग्रह गरेका थिए ।
सो अवसरमा प्रमुख चिन्तन तामाङले अहिलेको विषम परिस्थितिलाई मध्यनजर गर्दै राहत स्वरुप छुट दिएको बताए । उनले सबै कारोवार नै बन्द भई व्यवसायीहरुलाई खानै धौ धौं भएको अवस्थामा भाडा उठाउन नैतिकताले नदिने बताए । उनले नगरपालिका व्यवसायीहरुलाईविस्थापित नभई स्थापित गर्न चाहने भएकोले राहत दिएको बताए ।
धनकुटामा लकडाउनको समयमा नगरपालिका, धनकुटा अस्पताल, नेपाल पत्रकार महासंघ, नेपाल भूतपूर्व सैनिक संघ, श्री त्रिवेणी मावि, नेपाल निर्माण व्यवसायी संघ, समाज कल्याण संस्था धनकुटा ७ लगायत ३ सय २४ जना घरधनीहरुले व्यापारीहरुलाई घरभाडा छुट दिएको संघका अध्यक्ष राईले जानकारी दिए ।