धनकुटा कार्तिक १६ । कोरोनाको महामारी समुदायस्तरमा फैलिएसँगै धनकुटा कोभिड–१९ क्राईसिस मेनेजमेन्ट सेन्टरको बैठक विभिन्न निर्णय गर्दै सम्पन्न भएको छ । बैठकले आउँदो दिपावलीको समयमा देउसी भैलो खेल्न रोक लगाएको छ ।
सो बैठकले कोभिड –१९ बाट मृत्यू भएकाहरुको शव व्यवस्थापनका लागि स्थान छनौट स्थानीय तहहरुले गरी आ–आफ्नो पालिकामा आगामी बुधवारसम्म व्यवस्था मिलाउनु पर्ने निर्णय गरेको छ । सो व्यवस्था मिलाउन अघि कोहि संक्रमितको मृत्यू भएमा मूलघाटमै अन्तिम संस्कार गर्ने निर्णय गरेको छ । आमनागरिकहरुले गरेको पीसीआर परिक्षणमा पोजिटिभ देखिए पनि जिल्ला स्वास्थ्य कार्यालयलाई जानकारी नदिएको भन्दै प्रदेश सामाजिक मन्त्रालयसँग समन्वय गरेर तथ्यांक राख्ने र संक्रमित देखिएकाले कार्यालयलाइृ जानकारी दिन सूचना प्रकाति गर्ने निर्णय गरेको छ । सो जानकारी संक्रमितहरुले नदिई लुकाई राखेमा कानूनी कार्वाही गर्ने निर्णय गरेको छ ।
यस्तै बैठकले पीसीआर परिक्षण गर्ने व्यक्तिहरुले परिक्षण शुल्कको ५० प्रतिसत व्यहोर्ने र बाँकी ५० प्रतिसत सम्बन्धित स्थानीय तहहरुले व्यहोर्नु पर्ने निर्णय गरेको सेन्टरका अध्यक्ष तथा प्रमुख जिल्ला अधिकारी केशवप्रसाद विमलीले जानकारी दिए । उनले हिरासतमा रहेका बन्दीहरुको पीसीआर परिक्षणको शुल्क सम्बन्धित पालिकाले व्यहोर्ने जनाएको छ ।
यस्तै बैठकले सात वट स्थानीय तहहरुको दामासाही लगानीमा नयाँ शव बाहन खरिद गर्ने र सो शवबाहनको सञ्चालन नेपाल रेडक्रस सोसाईटी धनकुटाले गर्ने निर्णय गरेको महालक्ष्मी नगरपालिकाका प्रमुख पर्शुराम नेपालले जानकारी दिए ।
बैठकमा जिल्ला स्वास्थ्य कार्यालयका प्रमुख तुलसी गुरागाईले जिल्लाको कोभिड संक्रमितहरुको संख्या र अवस्थाका वारेमा जानकारी दिएका थिए ।
सेन्टरका अध्यक्ष विमलीको अध्यक्षतामा सम्पन्न बैठकमा प्रदेश सांसदद्वय लीला सुब्बा र कुसुमकुमारी श्रेष्ठले सुझाव दिएका थिए । यस्तै बैठकमा पाख्रीवास नगरपालिकाका प्रमुख बृषबहादुर राई, महालक्ष्मी नगरपालिकाका प्रमुख पर्शुराम नेपाल, धनकुटा नगरपालिकाका उपप्रमुख शकुन्तला बस्नेत, छथरजोरपाटी गाउँपालिकाका अध्यक्ष शेरबहादुर लिम्बु, शहीदभूमि गाउँपालिकाका उपाध्यक्ष रत्नश्वरी राईले कोभिड–१९ लाई परास्त गर्न आ–आफ्नो पालिकाको तर्फबाट हुनसक्ने सहयोग गर्ने प्रतिवद्धता जनाए ।
बैठकमा जिल्ला समन्वय अधिकारी रामनारायण श्रेष्ठ, बरख गण सल्लेरीका गणपति कर्णेल भगवान थापा मगर, जिल्ला प्रहरी प्रमुख एसपी गोविन्द अधिकारी, सशस्त्र प्रहरी वल छिन्ताङ गुल्मका गुल्मपति डिएसपी रामचन्द्र श्रेष्ठ, जिल्ला अस्पतालका प्रमुख डा. पुजन विश्वकर्मा, धनकुटा नगरपालिका वडा नं. ९ का वडाध्यक्ष सन्दिप रायमाझी, पत्रकार महासंघका अध्यक्ष राजेश्वरबहादुर श्रेष्ठ, उद्योग वाणिज्य संघका अध्यक्ष विजयसन्तोषी राई, रेडक्रस सोसाईटीका मन्त्री कृष्ण श्रेष्ठले धनकुटामा कोरोना भाईरसको संक्रमण समुखायस्तरमा फैलिदै गएकाले यसको जोखिम न्युनिकरण गर्न सचेतना अभियान सञ्चालन गर्नु पर्ने बताए । उनीहरुले शव व्यवस्थापनमा स्थानीयले विरोध जनाएकाले यसवारेमा समझदारी अपनाएर शवदाहस्थलको व्यवस्था गर्नुपर्ने बताए ।
बैठकको सञ्चालन प्रशासकीय अधिकृत जयराम श्रेष्ठले गरेको थिए ।
