धनकुटा । अनौपचारिक क्षेत्र सेवा केन्द्र (इन्सेक) प्रदेशको समन्वयमा धनकुटामा मानव अधिकार रक्षक र युरोपियन युनियनका प्रतिनिधी बीच धनकुटामा मानवअधिकारको विषयमा अन्तरक्रिया कार्यक्रम सम्पन्न भएको छ ।
कार्यक्रममा इन्सेक र युरोपियन युनियनको टोलीले धनकुटाको मानवअधिकारको अवस्थाको विषयमा जानकारी लिएको छ । छलफलमा डेलिगेशन द युरोपियन युनियन टुु नेपालका प्रतिनिधि डा।जोइले हिभानेट र लिसा सेफ्रासिक, युरोपियन युनियनकै शिवदत्त भण्डारी तथा इन्सेक मानव अधिकार शिक्षा कार्यक्रमका विभागीय प्रमुख मदन पौडेल प्रदेश १ प्रमुख सोमराज थापाको टोलीले धनकुटाको मानवअधिकारको विषयमा जानकारी लिएको थियो ।
कार्यक्रममा पारालिगल सहयोग समिति धनकुटाका अध्यक्ष कोपिला शंकरले मानव अधिकार रक्षकलाई आफैँ काम गर्न सक्ने बनाउँदै धनकुटामा अहिलेसम्म यस्ता कार्यक्रम हुन नसकेको बताइन् । उनले धनकुटाका कसरी काम गर्ने भनेर अधिकारकर्मी अन्यौलमा रहेको बताइन् ।
महिला पुनस्थापना केन्द्र धनकुटाकी अध्यक्ष हिमा चेम्जोङले सञ्चार माध्यम तथा सामाजिक सञ्जालको कारणले पिडित महिला झन पीडित हुनुपरेको बताइन् । पिडीत महिलालाई पटक पटक एउटै कुरा सञ्चारमाध्यम र सामाजिक सञ्जालले सार्वजनिक तथा विगत कोट्याइदिँदा समस्या भएको उनको भनाई छ ।
हुसाडेक नेपालको पूर्वअध्यक्ष गीता अधिकारीले पहिले र अहिले महिलाको अधिकारमा के कस्ता उपलब्धि भए यसको तथ्यांक विश्लेषण गर्नु पर्ने बताइन् । उनले महिलालाई ओझेलमा बनाएर देशको विकास हुन नसक्ने बताउदै आर्थिक, सामाजिक र साँस्कृतिक अधिकार सुनिश्चित हुनु पर्नेमा जोड दिइन् ।
गैरसरकारी संस्था महासंघ धनकुटाका अध्यक्ष मीनप्रसाद सुवेदीले राजनीतिक दबाबका कारण धेरै पिडितहरुले न्याय पाउन नसकेको र पिडकको राजनितिक दलले संरक्षण गरिरहेको बताए । उनले न्यायको पहँुचमा पुग्नलाई राजनीतिक दललाई कसरी छेलेर जाने भन्ने विषयमा समस्या रहेको बताए । सुवेदीले समानताको कुरा महिलालाई मात्र नभइ ज्येष्ठ नागरिक, बालबालिका, दलित, अपाङ्गता लगायत सिमान्तकृत समूदायलाई पनि आवश्यक रहेको बताए ।
पत्रकार महासंघ धनकुटा पूर्व अध्यक्ष खगेन्द्र प्रसाद घिमिरेले राजनितिक दलका धम्मीका कारण पत्रकारितामा समस्या रहेको बताए । उनले आफ्नो पक्षमा समाचार लेखाउन राजनितिक दलले पत्रकारलाई धम्क्याउने तथा आर्थिक प्रलोभनमा देखाएर धनकुटामा सञ्चारकर्मीलाई समस्यामा पार्ने तथा राजनितिक आस्थाका कारण केही पत्रकारले निष्पक्ष समाचार लेख्न छोडेको पनि बताए ।
पत्रकार महासंघ धनकुटा अध्यक्ष नगेन्द्र राईले सामाजिक सञ्जालका कारण पत्रकारिता धरापमा परेको बताए । कार्यक्रममा विभिन्न संघ सस्थाका प्रतिनिधि, अधिकारकर्मी तथा पत्रकार लगायतको उपस्थिति रहेको थियो ।
