धनकुटा । धनकुटा सदरमुकाममा रहेको ऐतिहासिक निशान भगवती मन्दिरमा दुई सय वर्ष पुरानो ढुंगेधारा पुनर्स्थापित गरिएको छ ।
बसन्तपञ्चमीको अवसर पारेर बिहीबार एक कार्यक्रमका वीच नेपाली सेनाका पूर्वी पृतनापति उपरथि सहदेव खड्काबाट पुनस्र्थापित गरिएको हो ।
तत्कालीन् करिव २ सय ४७ वर्ष पहिले स्थापना गरिएको निशान भगवतीको मन्दिर परिसरको भित्री भागमा रहेको तिन वटा पल्टनको लागि पनि छुट्टाछुट्टै ढुंगे धारा स्थापना गरिएको थियो । मन्दिरमा निर्माण गरिएको ३ वटा पुरानो शैलीका ढुङ्गेधारा मन्दिरको मुलगेट भन्दा भित्र रहेका छन् । मुख्य गरेर मन्दिरमा रहेको जंङ्गी निशान गण, श्रीजंग गण र इन्द्रध्वज गणको निशानको नाममा छुट्टाछुट्टै ढुङ्गेधारा निर्माण गरिएको मन्दिर व्यवस्थापन समितिका महासचिव जनार्दन घिमिरेले बताए ।
धारा वि.सं. २०५२ सालमा धनकुटा हिले लोकमार्ग निर्माण गर्ने क्रममा धनुकटाको जिरोप्वाइन्टमा रहेको ओढारमा भेटिएको थियो । उक्त ओढार भित्र अहिले निशान मन्दिरमा स्थापना गर्न लागिएको ढुङ्गे धारा भेटिएको हो । धारा संरक्षण र सुरक्षाको कारणले तत्कालिन प्रदेश संग्राहलय धनकुटामा राखिएको थियो । धारा सर्वसाधरणको लागि निशान मन्दिरको वाहिरी भागमा खुल्ला राखिएको छ । ढुंगेधारा तथा प्रवेशद्वार गेटमा तेलिया ईंटाको प्रयोग गरिएको छ ।
२ नंं वाहिनीपति सहायक रथी महेशकुमार थापाको संयोजकत्वमा तथा श्री भीमदल गणका गणपति प्रमुख सेनानी सुमन थापा एवम् गणका सकल दर्जाको अथक प्रयास र निशान भगवती मन्दिर व्यवस्थापन समितिको सक्रियतामा उक्त निमार्ण कार्य सम्पन्न भएको हो ।