धनकुटा । शनिवार राती धनकुटा महोत्सवस्थलको प्रवेशद्वार गेटमा भएको अत्याधिक भीडमा ठेलमठेल हुँदा कन्सर्ट हेर्न गएका २४ जना घाइते भएका छन् । जसमध्ये ३ जनाको अवस्था गम्भिर रहेको छ ।
१९ जनाको अवस्था सामान्य रहेका छन् । गम्भिर घाइते भएका तीन सहित १९ जनालाई थप उपचारको धरानस्थित विपी कोइराला स्वास्थ्य विज्ञान प्रतिष्ठानमा पठाइएको छ ।
गम्भिर घाइते हुनेमा महालक्ष्मी नगरपालिकाकाको माहरेककटरेको श्रेया कटुवाल, प्रकट जीतपुरको श्रेष्ठ, प्रकटको आमा कुशुम श्रेष्ठ छन् । त्यस्तै धनकुटा नगरपालिका वडा नं. १ हिलेका उदिप राई, आइत राई, नन्दकुमार तामाङ, विशाल तामाङ, धनकुटा–५ शान्ता योगी, ठेगाना नखुलेका वर्ष ११ सुनिल लिम्बु, धनकुटा–७ को अंशु सुवेदी लगायत रहेका छन् ।
घाइते मध्ये ५ जना सामान्य घाइतेको जिल्ला अस्पताल धनकुटामा उपचार भइरहेको महोत्सव कलाकार संयोजन समितिका संयोजक रिदम श्रेष्ठले बताए । रेफर भएका घाइते विरामीलाई थप उपचारको लागि छिटो भन्दा छिटो उद्वार गरी धरान स्थित विपी कोइरालामा पठाइएको उनले बताए ।
धनकुटा महोत्सबको आजको कार्यक्रममा चर्चित गायक प्रमोद खरेलको साँगितिक प्रस्तुती हुने तय भएको थियो । गायक खरेलको सांगितिक कार्यक्रम हेर्न दर्शकको अत्याधिक भीड लागेको थियो । उनको प्रस्तुती हुन केही समय अघिको घटना हो । घटना भएलगत्तै स्थानीय प्रशासनले महोत्सव अनिश्चितकालसम्मको लागि स्थगित गरेको निमित्त प्रमुख जिल्ला अधिकारी ममता अधिकारीले बताइन् ।
