धनकुटा । आगामी माघ २३ गतेदेखि सहिद रामकृष्ण श्रेष्ठ अन्तरपालिका महिला फुटवल प्रतियोगिता हुने भएको छ ।
सहिद रामकृष्ण श्रेष्ठ स्मृति प्रतिष्ठानले पत्रकार सम्मेलनको आयोजना गर्दै आगामी माघ २३ देखि २६ गतेसम्म धनकुटा–५ तल्लो टुँडिखेलमा प्रतियोगिता हुन लागेको जानकारी दिएको हो ।
प्रतियोगितामा जिल्ला सात स्थानीय तहवाट एक÷एक टिमको सहभागिता हुने प्रतिष्ठानका अध्यक्ष ईश्वर श्रेष्ठले बताए । प्रतियोगिताको विजेता टिमले ६० हजार रुपैया नगद पुरस्कार सहित ट्रफि र उपविजेता टिमले नगद ३० हजार रुपैया सहित ट्रफी प्राप्त गर्ने आयोजकले पत्रकार सम्मेलन मार्फत जानकारी दिएको थियो ।
विगतको संस्करण भन्दा यो पटक पुरस्कार राशिमा वृद्धि गरिएको श्रेष्ठले बताए । गत संस्करणको विजेताले ५० हजार र उपविजेताले २५ हजार पुरस्कार प्राप्त गरेका थिए । हरेक खेलमा वुमन अफ द म्याच, प्रतियोगिताको उत्कृष्ट खेलाडी र विधागत रुपमा उत्कृष्ट हुने खेलाडीलाई पुरस्कारको व्यवस्था गरिएको छ ।
वि.सं. २०३० चैत्र ३ गते तत्कालीन राजा विरेन्द्र विराटनगर आउँदा बम प्रहार गर्ने क्रममा श्रेष्ठको निधन भएको थियो । उनलाई २०७४ माघ ३ गते तत्कालीन् प्रधानमन्त्री शेरवहादुर देउवा सरकारले सहिद घोषणा गरेको हो । श्रेष्ठको स्मृतिमा प्रतिष्ठानले २०७६ सालदेखि महिला फुटवल प्रतियोगिता संचालन गर्दै आएको छ । यस पटकको प्रतियोगिता तेस्रो संस्करण हो ।