धनकुटा । साँगुरीगढी गाउँपालिका वडा नंं ३ कुसेटारमा आगामी माघ २० गतेदेखि चौथो सरस्वती कप नकआउट फुटवल प्रतियोगिता हुने भएको छ । स्थानीय ड्रिम बोइज फुटवल क्लवको आयोजनामा आगामी माघ २० देखि २५ गतेसम्म कुसेटारको खेल मैदानमा प्रतियोगिता आयोजना हुन लागेको हो ।
प्रतियोगितामा धनकुटा सहित तेह्रथुम र सुनसरीको गरी २३ वटा टिमको सहभागिता रहने आयोजक ड्रिम बोइज फुटवल क्लवका अध्यक्ष नविन माझीले बताए ।उनका अनुसार प्रतियोगिताको विजेताले नगद ५० हजार सहित ट्रफी र प्रमाण पत्र प्राप्त गर्नेछ । त्यस्तै उपविजेता टिमले नगद ३० हजार सहित ट्रफी र प्रमाण पत्र प्राप्त गर्नेछ । विगतको संस्करण भन्दा यो पटक पुरस्कार राशिमा वृद्धि गरिएको अध्यक्ष माझीले बताए । गतवर्ष विजेतालाई ४० र उपविजेतालाई २५ हजार रुपैया प्रदान गरिएको थियो । प्रतियोगितामा विधागत रुपमा उत्कृष्ट हुने खेलाडीलाई पुरस्कारको व्यवस्था पनि गरिएको छ ।
श्रीपंञ्चमीको बेला कुसेटार लाग्दै आइरहेको सरस्वती बजारको अवसर पारेर विगत ४ वर्षदेखि प्रतियोगिता संचालन हुँदै आइरहेको आयोजकले जानकारी दिएको छ । गतवर्ष तेह्रथुमको रोयल छथरले प्रतियोगिताको उपाधी जितेको थियो । प्रतियोगिता संचालन गर्नको लागि साँगुरीगढी गाउँपालिका र ३ नं. वडा कार्यालयले पनि सहयोग गरेको छ । त्यस्तै स्थानीय वासिन्दा तथा कुसेटार घर भई रोजगारीको सिलसिलामा देश तथा विदेशमा रहेका व्यक्तिहरुवाट पनि सहयोग प्राप्त भइरहेको आयोजकले जानकारी दिएको छ ।
