धनकुटा । साँगुरीगढी गाउँपालिका वडा नं. ३ कुसेटारमा जारि चौथो सरस्वती कप नकआउट फुटवल प्रतियोगिता अन्र्तगत आइतवार चार खेल सम्पन्न भए ।
पहिलो खेलमा द राइजिङ युथ क्लवलाई शुन्यका विरुद्ध ५ गोलले पराजित गर्दै तुङ्खा अघिल्लो चरणमा प्रवेश गरेको छ । एक पक्षिय खेलमा सहज जित हासिल गर्दै तुङ्खा अघिल्लो चरणमा प्रवेश गरेको हो ।
त्यस्तै दोस्रो खेलमा उदयपुरलाई ४–१ गोलअन्तरले पराजित गर्दै भेडेटार फुटवल क्लव दोस्रो चरणमा प्रवेश गरेको छ ।
आजै सम्पन्न तेस्रो खेलमा सिर्जनशील फुटवल क्लव विजयी हुँदै दस्रो चरण प्रवेश गरेको छ । सिर्जनशीलले इन्द्रेणी फुटवल क्लवलाई ५–३ गोलअन्तरले पराजित गर्यो ।
आइतवार सम्पन्न अन्तिम खेलमा मौनावुधुक फुटवल क्लवलाई २–१ गोलअन्तरले पराजित गर्दै पिङ्वुङ फुटवल क्लव पनि दोस्रो चरणमा प्रवेश गरेको छ ।
प्रतियोगिता अन्र्तगत सोमवार देखि दोस्रो चरणको खेलहरु हुने आयोजकले जानकारी दिएको छ । धनकुटा सहित तेह्रथुम र सुनसरीको गरी २३ वटा टिमको सहभागिता रहेको प्रतियोगिताको विजेताले नगद ५० हजार सहित ट्रफी र प्रमाण पत्र प्राप्त गर्नेछ । त्यस्तै उपविजेता टिमले नगद ३० हजार सहित ट्रफी र प्रमाण पत्र प्राप्त गर्नेछ । प्रतियोगितामा विधागत रुपमा उत्कृष्ट हुने खेलाडीलाई पुरस्कारको व्यवस्था पनि गरिएको छ ।
श्रीपंञ्चमीको बेला कुसेटार लाग्दै आइरहेको सरस्वती बजारको अवसर पारेर विगत ४ वर्षदेखि प्रतियोगिता संचालन हुँदै आइरहेको आयोजकले जानकारी दिएको छ । प्रतियोगिता संचालन गर्नको लागि साँगुरीगढी गाउँपालिका र ३ नं वडा कार्यालयले पनि सहयोग गरेको छ । त्यस्तै स्थानीय वासिन्दा तथा कुसेटार घर भई रोजगारीको सिलसिलामा देश तथा विदेशमा रहेका व्यक्तिहरुवाट पनि सहयोग प्राप्त भइरहेको आयोजकले जानकारी दिएको छ । २५ गतेसम्म कुसेटारको खेल मैदानमा प्रतियोगिता संचालन भइरहेको छ ।
