धनकुटा । आगामी चैत्र ८ देखि १२ गतेसम्म धनकुटामा कोशी प्रदेशस्तरीय ब्याडमिन्टन प्रतियोगिता हुने भएको छ । धनकुटा जिल्ला ब्याडमिन्टन संघ धनकुटाको आयोजनामा कोशी प्रदेश स्तरीय तथा खुल्ला दोस्रो धनकुटा कप-२०७९ ब्याडमिन्टन प्रतियोगिता हुने भएको हो ।
प्रतियोगितामा प्रदेश खुल्ला पुरुष तथा महिला एकल, डबल्स, खुल्ला नेपाल भेट्रान्स र खुल्ला नेपाल सुपर नेपाल भेट्रान्स गरि ६ वटा विधामा खेल हुनेछ । प्रदेश खुल्ला पुरुष तथा महिला एकल र डबल्समा प्रथम हुनेले २० हजार, दोस्रोले १२ हजार र तेस्रोले ४/४ हजार नगद, मेडल ट्रफी र प्रमाणपत्र पुरस्कार पाउने धनकुटा जिल्ला ब्याडमिन्टन संघका अध्यक्ष यज्ञश्वरवहादुर श्रेष्ठले बताए ।
त्यस्तै पुरुष तथा महिला डबलमा प्रथम हुनेले ३० हजार, दोस्रोले २० हजार र तेस्रोले ५/५ हजार नगद सहित मेडल ट्रफी र प्रमाणपत्र पुरस्कार पाउने जनाइएको छ ।
खुल्ला नेपाल भेट्रान्स ४५ वर्ष माथि र खुल्ला नेपाल सुपर नेपाल भेट्रान्स ५५ वर्ष माथि प्रथम हुनेले २५ हजार, दोस्रो हुनेले १५ हजार र तेस्रो हुनेले ५/५ हजार नगद सहित मेडल ट्रफी र प्रमाणपत्र प्राप्त गर्नेछन् । सबै विधामा गरी दुई सय भन्दा वढी खेलाडिहरु सहभागी हुनेछन् । प्रतियोगितामा १५ लाख ५० हजार खर्च हुने बताइएको छ । प्रतियोगिताको मुख्य प्रायोजक धनकुटा नगरपालिका, सहप्रायोजक छिन्ताङ घर भई हाल हङकङ निवासी बिरभक्त्त राई, प्रदेश खेलकुद विकास वोर्ड कोशी प्रदेश सहकार्यको रुपमा रहेको छ ।
चैत्र ८ गते देखि हुने प्रतियोगिता धनकुटा-६ स्थित बहुउद्देश्यीय सामुदायिक भवनमा हुनेछ । प्रतियोगिताको उद्घाटन पूर्वमन्त्री तथा प्रतिनिधिसभा सदस्य राजेन्द्रकुमार राईले गर्ने तय भएको आयोजकले जानकारी दिएको छ ।
