धनकुटा । दुई वर्ष अघि सडक दुर्घटनामा परि निधन भएका प्राथमिक स्वास्थ्य केन्द्र डाँडाबजारमा कार्यरत स्वास्थ्यकर्मी राकेश राईको स्मृतिमा परिवारले २ लाख ५१ हजार रुपैयाको अक्षयकोष स्थापना गरेका छन् ।
बुधवार प्राथमिक स्वास्थ्य केन्द्र डाँडाबजारमा आयोजित एक कार्यक्रमका विच स्वर्गीय राईका वुवा अकल वहादुर राई र आमा राजकुमारी राईले संयुक्त रुपमा चेक र अक्षय कोषको आवश्यक कागजातहरु स्वास्थ्य केन्द्रका प्रमुख डा. जुवेर आलम अन्सारी, साँगुरीगढी गाउँपालिका अध्यक्ष जितेन्द्र राई, ५ नं. वडाका वडाध्यक्ष खड्गबहादुर लिम्बुलाई हस्तान्तरण गरेका थिए ।
छोराको स्वास्थ्य क्षेत्रको अधुरो कार्यलाई पुरा गर्ने लक्ष्यका साथ अक्षय कोषको स्थापना गरेको वुवा राजकुमार राईले बताए । प्राथमिक स्वास्थ्य केन्द्र डाँडाबजारको तर्फमा स्वर्गीय राईको वुवाआमालाई सो अवसरमा सम्मान समेत गरिएको थियो । कार्यक्रमका प्रमुख अतिथि साँगुरीगढी गाउँपालिका अध्यक्ष जितेन्द्र राईले सम्मान पत्र प्रदान गरेका थिए ।
अक्षयकोषबाट प्राप्त ब्याज रकमबाट स्वास्थ्य, शिक्षा लगायत अन्य महत्वपूर्ण कार्यमा खर्च गरिने बताइएको छ । स्वर्गीय राईको स्मृति सभाको अवसरमा स्वास्थ्य केन्द्र परिसरमा विरामीलाई वस्न सहज होस् भन्ने उदेश्यले फलैचा समेत स्थापना गरिएको छ ।
