धनकुटा ५ बैसाख ।
नेपाल अर्बुद रोग निवारण संस्था, धनकुटाको आयोजनामा धनकुटामा निःशुल्क क्यान्सर रोगको परिक्षण शिविर हुने जनाएको छ । सो परिक्षण शिविर आगामी बैशाख ८ गतेदेखि ११ गते सम्म हुने छ ।
बैशाख ७ गते नेपाल अर्बुद रोग निवारण संस्था केन्द्रिय समिति र भक्तपुर क्यान्सर अस्पतालको टोलीले सिराहाबाट शिविर शुरु गर्ने संस्थाका केन्द्रिय अध्यक्ष लोकेन्द्रकुमार श्रेष्ठ इश्वरले जानकारी दिए ।
धनकुटामा भने निःशुल्क शिविर बैशाख ८ गतेदेखि विभिन्न स्थानमा गरिने नेपाल अर्बुद रोग निवारण संस्था धनकुटा शाखाका अध्यक्ष कमलकुमार श्रेष्ठले जानकारी दिए । उनका अनुसार बैशाख ८ गते मूलघाटस्थित विश्रान्ति मन्दिरमा गरिने छ । त्यसपछि ९ गते छथरजोरपाटी गाउँपालिकाको सिधुवास्थित स्वास्थ्यचौकीमा गरिने छ । यस्तै बैशाख १० गते धनकुटा नगरपालिका वडा नं. ३ को स्थानीय व्यवस्थावनमा कागतेमा गरिने वडाध्यक्ष विकास घिमिरेले जानकारी दिए ।
यसैगरी लोकतन्त्र दिवसका दिन अर्थात बैशाख ११ गते धनकुटा अस्पतालमा गरिने छ । सो परिक्षणमा महिला दिदीबहिनीहरुको विशेषगरी पाठेघर क्यान्सरसम्बन्धि परिक्षण गरिने स्थानीय सहयोगी संस्था प्रस्ताविक लेडी जेसिजका अध्यक्ष प्रमिशा श्रेष्ठले जानकारी दिए । यसका साथै शिविरमा गाईनो सम्बन्धि, प्यापस्मेयर परिक्षण, भिआईए परिक्षण, पाठेघरको रिंग प्रोल्याप्स सम्बन्धि परिक्षण गरिने छ । शिविरमा पुरानो निको नभएको घाउाहरुको र शरिरका गाँठागुँठीहरुको पनि परिक्षण गरिने छ ।
सो परिक्षण वरिष्ठ अंकोलोजी डा. इशा वादे श्रेष्ठ, क्यान्सर रोग विशेषज्ञ डा. प्रभु शाहलगायतको टोलीले गर्ने छ । सो विशरको स्थानीय सहयोगीहरुमा नेपाल पत्रकार महासंघ धनकुटा शाखा, देव्रेवास समाज सुधार समिति धनकुटा, प्रस्ताविक धनकुटा लेडी जेसिज, नेपाल परिवार नियोजन संघ धनकुटा र लालिगुरास होटल हुलाकटोल रहेका छन् ।
यस किसिमको परिक्षण सबै अस्पतालमा नहुने र काठमाडौ. गएर गर्दा महंगो हुने भएकाले मौकाको फाईदा लिन हुन सबै महिला दिदीबहिनीहरुलाई पत्रकार महासंघका अध्यक्ष राजेश्वरबहादुर श्रेष्ठले जानकारी दिदै समयमै नाम टिकाउन आग्रह गरे ।
