धनकुटा १२ बैशाख .
भोली बैशाख १३ गते धनकुटामा दर्जनो नेपाली कांग्रेसका नेताहरु आउने भएका छन् । यसरी आउनेहरुमा पूर्व उपप्रधानमन्त्री तथा नेपाली कांग्रेसका पूर्व महामन्त्री प्रकाशमान सिंह, केन्द्रिय सदस्य तथा पूर्वमन्त्रीहरु बलबहादुर केसी, हृदयराम थानी, राजन केसी, सरिता प्रसाइ, दिपक खड्का आउने भएका छन् । यस्तै विभिन्न जिल्लाका कांग्रेसका सभापतीहरु पनि आउने भएका छन् । यसरी आउनेहरुमा काठमाडौका सभापति सुवोध बानिँया, इलामका हिमाल कर्माचार्य, पाँथथरका नरेन्द्रकुमार केरुङ्ग, उदयपुरका विदुर बस्नेत र खोटाङ्गका नरेश श्रेष्ठ छन् ।
यस्तै पूर्वसांसद तथा नेपाल आदिवासी जनजाति महासंघका पूर्व केन्द्रिय अध्यक्ष नरेन्द्र कुमाल, नेविसंघ केन्द्रिय समितिका पूर्व प्रवक्ता यूपी लामिछाने पनि आउन लागेको कांग्रेसका जिल्ला सचिव विजयसन्तोषी राईले जानकारी दिए ।
प्रदेश नं. १ को पहाडी जिल्लाको भ्रमणको सिलसिलामा केन्द्रिय नेताहरु धनकुटा आउन लागेको भएतापनि हालै निधन भएका कांग्रेसका पूर्व केन्द्रिय कोषाध्यक्ष रामकृष्ण ताम्राकारको निधनले १३ गतेसम्म पार्टीले शोक मनाउने निर्णय गरेको छ । यहि कारण धनकटामा कुनै पनि औपचारीक कार्यक्रमहरु भने नहुने जिल्ला उपसभापति नवीनकिशोर शाक्यले जानकारी दिए ।
कांग्रेसको बैसाख १४ गतेबाट पूर्वी पहाडी जिल्लामा आभसभा गर्ने कार्यक्रम रहेको छ । सो आमसभा तेह्थुमबाट शुरु हुने कांग्रेसका जिल्ला कोषाध्यक्ष दिनेश राईले जानकारी दिए ।
नेताहरु पार्टी कार्यालयमा भोली आएर पार्टी नेताकार्यकर्ताहरु, कांग्रेस निकट भातृ तथा शुभेच्छुक संस्थाका प्रमुख तथा प्रतिनिधी र पत्रकारसँग अनौपचारीक रुपमा मात्र भेटघाट गर्ने तय भएको जनाएको छ । शोकका कारण पार्टीले कुनैपनि औपचारिक कार्यक्रम नराखेको सचिव राईले जानकारी दिए ।