बैशाख १५ धनकुटा ।
धनकुटाको सहिदभूमि गाउँपालिकामा बालक छोराद्धारा बाबुको हत्या भएको छ । सहिदभूमि गाउँपालिका ४ पिप्ले निवासी १४ वर्षीय बालक विज्ञान राईले शनिबार राति आफ्नै बुबा ५५ वर्षीय इन्द्रबहादुर राईको हत्या गरेको प्रहरीले जनाएको छ ।
हिजो शनिबार बेलुका साढे ७ बजेतिर घरायसी विवादका कारण विज्ञानले आफ्नै बुबालाई कोदालाको पासोले टाउकोमा प्रहार गरेको थियो । सो प्रहारले पिता इन्द्रबहादुरको घटनास्थल मै मुत्यु भएको आखिँसल्ला प्रहरी चौकी इञ्चार्ज चुडामणी प्रधानले जानकारी दिए । घटना भएको केही समयपछि नै छिमेकीको उजुरीका आधारमा प्रहरी चौकीबाट प्रहरी टोली उनको घरमा पुगेको थियो । प्रहरी टोली पुग्दा उनी घरमै रहेका थिए । प्रहरीले बालक विज्ञानलाई घरैबाट पक्राउ गरेर शनिबार राति नै जिल्ला प्रहरी कार्यालय पठाएको प्रधानले बताए ।
जिल्ला प्रहरी कार्यालयका प्रहरी प्रमुख एसपी सुरेन्द्रबहादुर गुरुङले हत्या के कारण भएको भन्ने बारेमा अनुसन्धान भइरहेको जानकारी दिए । हत्या भएका इन्द्रबहादुरको शव पोष्टमार्टमका आज आईतवार जिल्ला अस्पताल धनकुटा ल्याएर परिवारको जिम्मा लगाईने प्रहरीले जनाएको छ ।
