धनकुटा २० बैशाख । विश्व प्रेस स्वतन्त्रता दिवस धनकुटालगायत विश्वभर मनाईएका छन् । सो अवसरमा धनकुटामा पत्रकार महासंघ र स्थानीय तहवीच अन्तक्र्रिया कार्यक्रम आयोजना गरिएको थियो ।
नेपालमा अझै पूर्ण प्रेस स्वतन्त्रता वहाली नभएको धनकुटामा विश्व प्रेस स्वतन्त्रता दिवसको अवसरमा आयोजित कार्यक्रमका सहभागीहरुले बताएका छन ।
नेपाल पत्रकार महासंघ धनकुटाद्वारा आयोजित प्रेस स्वतन्त्रता विषयक कार्यक्रममा जिल्ला समन्वय समितिका प्रमुख टंकबहादुर चुवानले प्रेस स्वतन्त्रता भएमात्र लोकतान्त्रिक गणतन्त्रको सुदृढ हुने बताए । उनले मोफसलको सञ्चारमाध्यम र सञ्चारकर्मीको अवस्था सहज नभएको भन्दै आवश्यक सहयोग स्थानीय तहले गर्नुपर्ने बताए ।
पत्रकार महासंघका शाखा अध्यक्ष राजेश्वरबहादुर श्रेष्ठको अध्यक्षतमा भएको कार्यक्रममा पत्रकार महासंघ धनकुटाका संस्थापक अध्यक्ष तथा महासंघका पूर्व केन्द्रिय उपाध्यक्ष सञ्जय सन्तोषी राई, पूर्व अध्यक्ष तथा नेपाल प्रेस युनियनका केन्द्रिय उपाध्यक्ष विजय सन्तोषी राई, पूर्व अध्यक्ष खगेन्द्र घिमिरे, प्रदेश सदस्य तथा प्रेस चौतारी नेपालका अध्यक्ष सन्तोष रुचाललगायतले लोकतन्त्रको संस्थागत विकासका लागि स्वतन्त्र पत्रकारिता फस्टाउनु पर्ने बताउँदै सरकारले विद्युतीय कारोवार ऐनको डण्डा चलाएर प्रेसलाई नियन्त्रण गर्न लागेको भन्दै विरोध जनाएका थिए ।
सो अवसरमा धनकुटकाका स्थानीय तहहरुको प्रमुखहरुको तर्फबाट छथरजोरपाटी गाउँपालिकाका प्रमुख शेरबहादुर लिम्बुले शुभकामना मन्तव्य राखेका थिए । उनले जनप्रतिनिधिहरुले गरेका राम्रा कामका प्रचारप्रसार र भूलबस गरिएका नराम्रा कामको सञ्चारकर्मीले सचेत गराउने भएकोले लोकतन्त्र संस्थागत विकासमा महत्वपूर्ण भूमिका रहेको बताए ।
यस्तै उपाध्यक्ष तथा उपप्रमुखहरुको तर्फबाट चौविसे गाउँपालिकका उपाध्यक्ष यज्ञकुमारी रुचालले सञ्चारकर्मीलाई राम्रा कामको प्रचार र खराव काममा सचेत गराउन आग्रह गरिन् । सो अवसरमा धनकुटा नगरपालिकाका प्रमुख प्रशासकीय अधिकृत सुरेन्द्र थापा, महालक्ष्मी नगरपालिकाका प्रमुख प्रशासकीय अधिकृत सहदेव रायमाझीले प्रेस स्वतन्त्रता कायम गर्न र पत्रकारहरुको क्षमता बृत्तिविकासका लागी स्थानीय सरकारले आगामी वजेटमार्फत सहयोग गर्ने प्रतिवद्धता व्यक्त गरेका थिए । कार्यक्रमको संचालन पत्रकार महासंघका सचिव विदुर खवासले गरेका थिए ।
सो कार्यक्रममा चौविसे गापाका अध्यक्ष खजिन्द्र राई, सहिदभूमी गपाका अध्यक्ष मनोज राई, सहिदभूमीका उपाध्यक्ष रत्नश्वरी राई, जिल्ला सहकारी संघका अध्यक्ष सुन्दरवाबु श्रेष्ठ, प्रेस युनियनका अध्यक्ष हिमा चेम्जोङ, फोनिजका अध्यक्ष सन्तवीरलगायतको उपस्थिति रहेका थिए ।
