धनकुटा । पूर्वी पहाडी क्षेत्रको सबैभन्दा पुरानो फुटबल प्रतियोगिता सहिद भीमनारायण गोल्डकपको १४ औं संस्करण आगामी बैशाख २८ गतेदेखि हुने भएको छ ।
सोमवार आयोजक समितिले पत्रकार सम्मेलनको आयोजना गर्दै गोल्डकपको १४ औं संस्करण आगामी बैशाख २८ गतेदेखि जेष्ठ ४ गतेसम्म धनकुटाको तल्ला टुँडिखेलमा आयोजना हुने जानकारी दिएको हो ।
प्रतियोगिता आयोजक सहिद भीमनारायण स्मृति प्रतिष्ठान हो । धनकुटा सदरमुकामस्थित तल्लो टुँडिखेलमा दर्शकदिर्घा तर्फको पक्की प्याराफिट तथा भिआइपी मञ्च निर्माण तथा मैदान सम्याउने लगायत कार्यले गतवर्ष प्रतियोगिता संचालन हुन नसकेको प्रतियोगिताको संयोजक शम्भु प्रधानले जानकारी दिए ।
गत २०७४ भदौं २८ गते सम्पन्न प्रतियोगिताको १३ औं संस्करणको उपाधी काठमाडौंको ब्वाइज यूनियन क्लवले जितेको थियो । उसले फाइनल खेलमा झापाको विर्ता युनाइटेड क्लवलाई पेनाल्टी सुटआउटमा पराजित गरेको थियो ।
यो संस्करणको प्रतियोगितामा ८ टिमको सहभागिता रहने छ । प्रतियोगितामा आयोजक धनकुटा ११ सहित क्यामरुन टोली डाउफिन्स क्लव, ए डिभिजनको शसस्त्र प्रहरी क्लव (एपिएफ), फेन्स क्लव, झापाको विर्तामोड यूनाइटेड क्लव, मोरङको विन्दाबासिनी फुटवल क्लव, सुनसरीको धरान फुटवल क्लव, नेपाल पुलिस क्लव र च्यासल क्लव मध्ये एक टोली गरि ८ टिमको सहभागिता रहने प्रतिष्ठानका महासचिव रोशन श्रेष्ठले बताए ।
गतसंस्करण भन्दा यो संस्करणमा पुरस्कार राखिमा वृद्धि गरिएको छ । विजेताललाई ४ लाख र ट्रफि, उपविजेताले २ लाख र ट्रफि प्रदान गरिनेछ । विधागत पुरस्कारको समेत व्यवस्था गरिएको छ । हरेक खेलमा म्यान अफ फि म्याचको व्यवस्था गरिएको उनले बताए ।
प्रतियोगिता ंसंचालन गर्न २५ लाख रुपैया बजेट विनियोजन गरिएको छ । मुख्य प्रायोजक रुसलान भोड्का रहेको प्रतियोगिताको सहप्रायोजकमा जगदम्वा स्टिल, निगाले सिमेन्ट, सल्भ नेपाल, अजावको आइसक्रिम र जिल्ला फुटवल संघको प्राविधिक सहयोग रहेको उनले बताए । त्यस्तै धनकुटाले नगरपालिकाले ७ लाख ५० हजार रुपैया आर्थिक सहयोग प्रदान गरेको छ ।
टुँडिखेलको प्याराफिट पक्की रहेको कारण गेटटिकट बाट ५ लाख रुपैया संकलन हुने अपेक्षा आयोजकको छ । प्रतियोगिता संचालन गर्न मञ्च व्यवस्थापन, फिल्ड व्यवस्थापन, टिम व्यवस्थापन, स्वयसेवक परिचालन लगायत विभिन्न उपसमिति समेत गठन गरिएको छ ।
प्रतियोगीता नेपाली कांग्रेशका नेता शहिद भीमनारायण श्रेष्ठको नाममा २०५५ शालमा स्थापना गरिएको थियो । शहिद भीमनारायण श्रेष्ठलाई विराटनगरमा राजा विरेन्द्रलाई बम हानेको आरोपमा पक्राउ गरि २०३५ शालमा तत्कालिन सरकारले गोली हानी हत्या गरीएको थियो । श्रेष्ठलाई गतवर्ष सरकारले सहिदको रुपमा सुचिकृत गरेको थियो ।