धनकुटा । पूर्वी पहाडी जिल्लाको सबैभन्दा पुरानो तथा प्रतिष्ठित फुटवल प्रतियोगिताको १४ औं संस्करण शनिवार देखि सुरु भएको छ ।
धनकुटा सदरमुकामस्थित तल्लो टुँडिखेलमा शनिवार भएको उद्घाटन खेलमा भारतको रोयल एफसीलाई सडनडेथमा पराजित गर्दै मोरङको विन्ध्यावासिनी क्लव सेमिफाइनलमा प्रवेश गरेको छ ।
निर्धारित समय भित्र दुवै टिमबाट कुनै गोल हुन नसकेपछि खेल पेनाल्टी सुटआउटमा धकेलिएको थियो । पेनाल्टीमा मोरङको तर्फवाट एलेक्स, डाडी, सुसिल राई, विनोद केसी र तिर्थ वस्नेतले गोल गरेका थिए भने पराजित भारतको रोयल एफसीको तर्फवाट सोनम भुटिया, आशिष देवान, प्रशान्त राई, रोनाल्ड र क्रिसले गोल गरेका थिए ।
सडनडेथमा मोरङका कप्तान अशोक खवासले गोल गरे भने रोयल एफसीका प्रतिक लामाको प्रहार मोरङका गोलकिपर सूर्य अधिकारीले रोकेका थिए । उनी खेलको म्याद अफ दी म्याच घोषित हुँदै नगद ५ हजार पुरस्कार हात पारे ।पहिलो हाफमा रोयल एफसीले मोरङलाई दवावमा राखेको थियो । खेल सुरु भएको ८ औं मिनेटमा रोयलका
रोनाल्डले डिवक्स एरिया भित्रवाट प्रहार गरेको शसक्त प्रहार पोष्ट माथिवाट वाहिरिएको थियो । त्यस्तै २० औं मिनेटमा वुद्धवल तामाङ पनि गोलगर्न वाट चुके । पहिलो हाफमा मोरङका तिर्थ वस्नेत, सुसिल राई र गिल्सन राई पनि गोल गर्नवाट चुकेका थिए ।
दोस्रो हाफमा मोरङले सुधारिएको प्रदर्शन गरेको थियो । दोस्रो हाफको अन्त्यतिर सुसिल राईले दिलाएको पासमा गिल्सन राईले डिवक्स एरिया भित्रवाट प्रहार गर्दा पोस्टमा ठोक्किएको थियो । निर्धारित समय गोलरहित वरावरीमा सकिएपछि समयअभावको कारण इन्जुरी ट्राइव्रेकर खेलाइएको थियो ।
विजयी टिमका प्रशिक्षक दिपेन्द्र चौधरीलेले खेलाडी वीच तालमेल नमिल्दा निर्धारित समय भित्र गोलस्कोर ननिस्कीएको बताए । उनका अनुसार पहिलो हाफमा केही दवाव भएता पनि दोस्रो हाफमा दवाव दिएर खेलेको बताए । त्यस्तै उनले खेलमैदानको प्रशंसा गरे । पहाडी जिल्लाको धेरै टुनामेन्ट खेलेपनि यस्तो राम्रो मैदानमा पहिलो चोटी खेलेको भन्दै आयोजकलाई धन्यवाद दिए ।
त्यस्तै पराजित टिम रोयल एफसिका प्रशिक्षक नकुल रोयलले रेफ्रिको कारण आजको खेलमा पराजित भएको बताए । विपक्षी खेलाडीले हातले वल समात्दा समेत रेफ्रिले रेडकार्ड नदिएर एल्लो कार्ड दिएको र आफ्नो खेलाडीलाई विपक्षी खेलाडीले डिवक्स एरिया भित्र लडाउँदा समेत पेनाल्टी नदिँदा खेलमा पराजित हुन पुगेको उनले गुनासो गरे । त्यस्तै उनले अहिले सम्म नेपालमा खेलेको धेरै टुनामेन्ट मध्ये धनकुटाको आयोजक र खेलमैदानको स्तर धेरै राम्रो भएको समेत बताए ।
आइतवारको खेल आयोजक धनकुटा ११ र गतसंस्करणको उपविजेता विर्तामोड युनाईटेड क्लव झापा वीच हुने आयोजक समितिका महासचिव रोशन श्रेष्ठले बताए । १४ औं संस्करणको विजेताले नगद ४ लाख र ट्रफि, उपविजेताले २ लाख र ट्रफि आयोजक समितिका संयोजक शम्भु प्रधानले बताए । प्रतियोगिताको उद्घाटन प्रतिनिधि सभा सदस्य राजेन्द्र राईले गरेका थिए ।