धनकुटा । पूर्वअर्थमन्त्री तथा नेपाली कांग्रेसका केन्द्रिय सदस्य डा. रामशरण महतले प्रेस स्वतन्त्रता नभए लोकतन्त्र समाप्त हुने बताए । सो कुरा प्रभावशाली नेता डा. महतले नेपाल प्रेस युनियन धनकुटाद्वारा आयोजित अन्र्तक्रिया तथा पत्रकार सम्मेलनमा बताएका हुन् । उनले मुलुकमा विकास र समृद्धीको जग नेपाली कांग्रेसले बसालेको समेत बताउँदै वर्तमान सरकार काम गर्न भन्दा गफ गर्न व्यस्त रहेको आरोप लगाए ।
सो कार्यक्रममा नेता महतले कांग्रेसले २०४८ सालमा सरकार गठन गरेपछि मुलुकमा विकास र समृद्धीको जग बसाएको बताए । उनले कांग्रेसले लिएको आर्थिक नीतिकै कारण माओवादी द्वन्द्वमा पनि आर्थिक संकट नपरेको जिकिर गरे । उनले अहिले त्यहि जगमा टेकेर विकास र समृद्धिको सपना देखीरहेको बताउँदै वर्तमान सरकारले अहिले ल्याउन लागेको प्रेस विरोधी कानूनले लोकतन्त्रनै खतरा पर्ने भएकाले यसको कांग्रेसले सदन र सडक दुवैमा सशक्त विरोध गर्ने जनाए ।
प्रेस युनियनका शाखा अध्यक्ष हिमा चेम्जोङ्गको अध्यक्षतमा सम्पन्न कार्यक्रममा प्रेस युनियनका केन्द्रिय उपाध्यक्ष विजयसन्तोषी राईले वर्तमान सरकार अधिनायकवाद तर्फ लम्केको आरोप लगाउँदै स्वतन्त्र प्रेसलाई नियन्त्रण गर्ने प्रयास गरिरहेको बताए ।
सो कार्यक्रममा पूर्वमन्त्री तथा नेपाली कांग्रेसका केन्द्रिय सदस्य रामकृष्ण यादव, पूर्व सांसदहरु रामहरी खतिवडा, मनोहरनारायण श्रेष्ठ, प्रदेशसभा सदस्य लिला सुब्बा, नेपाल तरुण दलका महासचिव भूपेन्द्रजंग शाही, कांग्रेस धनकुटका सभापति अग्नीप्रसाद पौडेल, महासमिति सदस्यहरु रमेश महत, आनन्दसन्तोषी राई, कोषाध्यक्ष दिनेश राईलगायतको उपस्थिति रहेको थियो ।
अन्र्तक्रियमा कार्यक्रममा नेपाल प्रेस युनियनका केन्द्रिय उपाध्यक्ष विजय सन्तोषी राई, नेपाल पत्रकार महासंघ धनकुटका अध्यक्ष राजेश्वरबहादुर श्रेष्ठ, उपाध्यक्ष नगेन्द्र राई, पूर्व अध्यक्ष खगेन्द्र घिमिरे, प्रेस चौतारी नेपालका पूर्व केन्द्रिय सदस्य रमेशचन्द्र अधिकारी, साझा संचारका अध्यक्ष भेषराज कटेललगायतले कुनै पनि हालतमा पत्रकारहरुलाई अंकुश लगाउन र नियन्त्रण गर्न ल्याउन लागेको विधेयक पास हुन नदिने र त्यसको सशक्त विरोध गर्ने बताएका थिए ।
यसैगरी नेपाल पत्रकार महासंघ धनकुटा शाखाको आव्हनमा पत्रकारहरुले कालोपट्टी हातमा बाँधेर काम गरेको महासंघका सचिव विदुर खवासले जानकारी दिए ।
