धनकुटा । १४ औं संस्करणको सहिद भीमनारायण गोल्डकपको उपाधी सशस्त्र प्रहरी बलको एपिएफ क्लवले जितेको छ ।
सदरमुकाम स्थित तल्लो टुँडिखेलमा शुक्रवार सम्पन्न फाइनल खेलमा क्यामरुन टोली दाउफिन्स फुटबल क्लवलाई पेनाल्टी सुटआउटमा ३–२ गोल अन्तरले पराजित गर्दै एपिएफले उपाधी जितेको हो ।
विजेता एपिएफले भीमनारायण गोल्डकपको ट्रफी सहित नगद ४ लाख रुपैया जित्न सफल भयो । भने उपविजेता भएको दाउफिन्सले फस्ट रनरअप सहित नगद २ लाख रुपैयामा चित्त बुझायो ।
निर्धारित समयको खेल दुवै टिमको २÷२ गोलको बरावरी सकिएपछि विजेताको टुंगो पेनाल्टी सुटआउटबाट लिइएको छ । रेफ्रिले समय अभावको कारण देखाउँदै अतिरिक्त समय नखेलाइ सोझै पेनाल्टी सुटआउटमा खेलाएको थियो ।
पेनाल्टी सुटआउटमा एपिएफका रभि थिङ, घनश्याम थारु र हरि कार्कीले गोल गरेका थिए । भने वुद्धि राईको प्रहार दाउफिन्सका गोलकिपर प्रिसोले पञ्च गर्दै रोकेका थिए ।
त्यस्तै दाउफिन्सको तर्फवाट पेंटगा र गोलकिपर प्रिसोले मात्रै गोल गर्न सफल भए । नज्मा यानीक, मेसोके र यानीक वोआना गोल गर्न असफल रहे । यानीकले प्रहार गरेको गोलपोष्ट भन्दा माथीवाट वाहिरिएको थियो । मेसोके र वोआनाको प्रहार एपिएफका गोलकिपर अमृत चौधरीले रोकेका थिए ।
पहिलो हाफको ४० औं मिनेटमा यानिक वोआनाले गोल गर्दै दाउफिन्सलाई सुरुवाती अग्रता दिलाएका थिए । उनले डिवक्स एरियाबाट प्रहार गरेको शसक्त प्रहारले गोलपोष्टको जाली चुमेको थियो ।
पहिलो हाफ सकिदाँ दाउफिन्स १–० ले अगाडी रहेको थियो । तर खेलको ६० औं मिनेटमा एपिएफका रभि थिङले पेनाल्टी मार्फत गोल गर्दै खेल वरावरीमा ल्याए । दाउफिन्सका डिफेन्डर नज्मा यानिकले विपक्षी खेलाडी सुमित आलेमगरलाई डिवक्स एरियाभित्र फल गरेपछि एपिएफले पेनाल्टीको मौका पाएको थियो । सो पेनाल्टीका अवसरलाई सदुप्रयोग गर्दै रभिले गोल गरे ।
एक÷एक गोलको वरावरी भएपछि दाउफिन्सले आक्रमक खेल पस्किन थाल्यो । खेल वरावरी भएको ७ मिनेट पछि अर्थात ६७ औं मिनेटमा दाउफिन्सका पेंटगाले हेड मार्फत गोल गर्दै पूनः अग्रता दिलाए । नग्मा यानिकले फ्रिकिकवाट उपलब्ध गराएको सुन्दर पासलाई पेंटगाले सदुप्रयोग गर्दै हेडिङ मार्फत गोल गरे ।
निर्धारित समय सकिन करिव १ मिनेट वाँकी छदा एपिएफका रभि थिङले दिलाएको पासलाई सदप्रयोग गर्दै महेश लामाले गोल गर्दै खेल २–२ गोल को वरावरीमा ल्याए ।
खेल अवधिभर दुवै टिमका खेलाडी केही राम्रा अवसर सिर्जना गरेपछि गोल गर्नबाट चुके । विशेष गरी एपिएफको भन्दा दाउफिन्सका खेलाडीहरु केही राम्रा अवसर पाए पनि गोल गर्न सकेनन् ।
फाइनल खेलको म्यान अफ दी म्याच एपिएफका सुमित आले मगर घोषित भए । उनले नगद पाँच हजार सहित मेडल हात पारे ।
प्रतियोगिताको सर्वोत्कृष्ट खेलाडी एपिएफ रभि थिङ भए । उनले नगद २० हजार र मेडल प्राप्त गरे । विधागत तर्फ उत्कृष्ट गोलकिपर पुरस्कार एपिएफ अमृत चौधरी भए । सोही क्लवका सरोज कोइराला उत्कृष्ट डिफेन्डर, सुदिप श्रेष्ठ उत्कृष्ट प्रशिक्षक घोषित भए । त्यस्तै दाउफिन्सका एरियल इनामे उत्कृष्ट मिडफिल्डर, यानिक ओआना उत्कृष्ट स्टाइकर घोषित भएका थिए । उनीहरुले जनही १० हजार रुपैया र मेडल प्राप्त गरे ।
विजेता एपिएफका प्रशिक्षक सुदिप श्रेष्ठले दाउफिन्स जस्तो बलियो टिमलाई पराजित गरेर उपाधी जित्न पाउँदा खुसी लागेको बताए । ‘खेलाडीले सोचे अनुरुप खेल्दा जित सम्भव भयो’ उनले भने ‘आजको जीतको श्रेय सम्पूर्ण खेलाडीमा जान्छ’ यस प्रतियोगितामा एपिएफले ‘वी’ समुहको टोली ल्याएको उनले बताए । यता दाउफिन्सका टिम म्यानेजर आशिक थापा मगरले खेलाडीले थप स्कोर नवनाइ स्वार्थी खेल खेलेको कारण हार भएको प्रतिक्रिया दिए । कार्यक्रमका प्रमुख अतिथि तथा अखिल नेपाल फुटवल संघ (एन्फा)का अध्यक्ष कर्माछिरिङ शेर्पा, वरिष्ठ उपाध्यक्ष पंकज नेम्वाङ खेलाडीलाई पुरस्कार वितरण गरेका थिए ।
सहिद भीमनारायण गोल्डकप फुटवल प्रतियोगिताको स्थापना २००५ सालमा नेपाली कांग्रेसका नेता सहिद भीमनारायण श्रेष्ठको नामबाट गरिएको हो । सहिद श्रेष्ठलाई विराटनगरमा राजा विरेन्द्रलाई बम हानेको आरोपमा पक्राउ गरि २०३५ शालमा तत्कालिन सरकारले गोली हानी हत्या गरेको थियो । श्रेष्ठलाई गतवर्ष सरकारले सहिदको रुपमा सुचिकृत गरेको थियो । श्रेष्ठको स्मृतिमा हरेक वर्ष यस प्रतियोगिता सञ्चालन हुँदै आइरहेको छ । यस प्रतियोगिता सञ्चालन समितिको संस्थापक अध्यक्ष नेपाल पत्रकार महासंघ धनकुटाका वर्तमान अध्यक्ष राजेश्वरबहादुर श्रेष्ठ हुन् ।
पूर्वसंयोजक तथा प्रशिक्षक सम्मानित ः
यसैगरी प्रतियोगिताको समापन कार्यक्रमको अवसर पारेर आयोजक सहिद भीमनारायण स्मृति प्रतिष्ठानले प्रतियोगिताको पूर्वसंयोजक तथा फुटवल प्रशिक्षकलाई सम्मान गरिएको छ । सो गोल्डकप प्रतियोगिता प्रतिष्ठानले संचालन गर्नुपूर्व रहेको आयोजक समितिका संयोजक रहेका अशोक भगत श्रेष्ठ र फुटवल प्रशिक्षक सुमन श्रेष्ठले जिल्लाको फुटवलको क्षेत्रको विकास लागि योगदान पुर्याएको भन्दै सम्मान गरिएको हो । सम्मानित भएका श्रेष्ठद्वयलाई एन्फाका अध्यक्ष कर्माछिरिङ शेर्पाले सम्मान पत्र र खादा लगाएर सम्मान गरे l
दुई पत्रकार पुरस्कृत ः
१४ औं संस्करणको सहिद भीमनारायण गोल्डकप अवधिभर उत्कृष्ट समाचार सम्प्रेषण गरेको भन्दै दुई जना पत्रकारलाई आयोजक समितिले पुरस्कृत गरेको छ । पुरस्कृत हुनेमा प्रिन्ट मिडिया तर्फ अन्नपूर्ण पोष्ट दैनिक तथा एपिवान टेलिभिजनका धनकुटा संवाददाता हरिबहादुर लम्जेल र कान्तिपुर टेलिभिजनका धनकुटा संवाददाता विनोद घिमिरे रहेका छन् । उनीहरुलाई आयोजक सहिद भीमनारायण स्मृति प्रतिष्ठानका अध्यक्ष पुरेन्द्रलाल श्रेष्ठले जनही दुई हजार पाँच सय सहित प्रमाण पत्र प्रदान गरे ।