धनकुटा । स्थानीय तह स्तरीय फुटबल प्रतियोगिता ‘छथर जोरपाटी कप–२०७६’ मा आयोजक छथरजोरपाटी टीम ‘ए’ ले विजय सुरुवात गरेको छ ।
सिँधुवा खेल मैदानमा वुधवार सम्पन्न उद्घाटन खेलमा पाख्रिवास नगरपालिकालाई ३–२ गोलअन्तरले पराजित गर्दै आयोजक टिमले विजयी सुरुवात गरेको हो । जीतसँगै छथरजोरपाटीको टिम सेमिफाइनलमा प्रवेश गरेको छ ।
निक्कै प्रतिस्पर्धात्मक खेलमा छथरजोरपाटीको लागि निमा साङ्गे शेर्पाले २ तथा दिवश भुजेलले १ गोल गरे । त्यस्तै पाख्रिवासका लागि अर्जुन घिसिङले दुई गोल गरे पनि आफ्नो टिमलाई विजयी गराउन सकेनन् । उद्घाटन खेलको म्यान अफ दी म्याच छथर जोरपाटीका दुई गोलकर्ता शेर्पा घोषित भए । उनलाई म्यान अफ दी म्याचको ट्रफी प्रदान गरिएको थियो ।
छथरजोरपाटी गाउँपालिका खेलकुद विकास समितिको आयोजनामा सुरु भएको सो प्रतियोगिताका प्रायोजक छथरजोरपाटी गाउँपाकिा रहेको छ । भने प्राविधिक सहयोग जिल्ला फुटवल संघ धनकुटाले गरेको छ ।
नकआउट चरण भइरहेको प्रतियोगिताको विजेताले नगद १ लाख रुपैयासँगै ट्रफी हात पार्नेछ भने उपविजेताले ५० हजार र ट्रफि पाउने आयोजक समितिका अध्यक्ष चन्द्र लिम्बुले बताए ।
आगामी जेष्ठ ३२ गते शनिवार सम्म हुने प्रतियोगितामा धनकुटा नगरपालिका, महालक्ष्मी नगरपालिका, पाख्रिवास नगरपालिका, सहिदभूमि गाउँपालिका, चौविसे गाउँपालिका, साँगुरीगढी गाउँपालिका र आयोजक छथरजोरपाटी गाउँपालिकाको दुई टिम ‘ए’ र ‘वी’ गरि ८ टिमको सहभागिता रहेको आयोजक समितिका सचिव दिवश खड्काले बताए ।