धनकुटा ३ असार
धनकुटा नगरपालिका खानेपानी तथा सरसफाई उपभोक्ता समितिको निर्वाचन स्थगित गरेकोमा आश्चर्य प्रकट गर्दै नेपाली कांग्रेसले विज्ञप्ती प्रकाशित गरी गंभीर ध्यानार्कषण भएको जनाएको छ । समितिले विधान सम्मत समय सीमाभित्रै निर्वाचन गर्ने गरी निर्वाचन प्रक्रिया अगाडि बढाईरहेको थियो । यस्तो अवस्थामा खानेपानी जस्तो अतिसंवेदनशील र अति महत्वपूर्ण विषयमा समेत राजनीतिकरण गरी पूर्वाग्रही ढंगबाट निर्वाचन स्थगित गरेको भन्दै सभापति अग्नीप्रसाद पौडेल र सचिव विजय सन्तोषी राईद्वारा हस्ताक्षरित प्रकाशित गरिएको विज्ञप्तीमा जनाएको छ । विज्ञप्तीअनुसार अभिलम्ब स्थगित गरिएको निर्वाचन गर्न समेत माग गरेको छ ।
विज्ञप्तीमा केही राजनीतिक दलका कार्यकर्ताहरुले कीर्ते हस्ताक्षर गरी कपोलकल्पित आरोप लगाई निर्वाचन स्थगित गरी पाउँ भन्ने निबेदन दिएको बुझिएको र छानबिनै नगरी सोही आधारमा धनकुटा नगरपालिकाको आग्रहमा जिल्ला प्रशासनको आदेशमा निर्वाचन शुरु हुनु एक दिन अघिमात्र निर्वाचन स्थगित गर्नु लोकतन्त्रकै उपहास भएको विज्ञप्तीमा उल्लेख गरेको छ । विज्ञप्तीमा कीर्ते हस्ताक्षर कसलेगरेको हो छानबिन गरी कारवाही गर्नसमेत गर्न सम्वन्धित निकायसँग माग गरेको छ ।
विज्ञप्तीमा नगरवासीहरुलाई स्वच्छ र सफा पिउने पानीको व्यवस्था गर्नु धनकुटा नगरपालिकाको पनि दायित्व भएको उल्लेख गर्दै स्थानीय तहको निर्वाचन भए यता नगरपालिकाले उपभोक्ता समितिलाई कुनै पनि प्रकारको बजेट उपलब्ध नगराउनु राजनीति प्रष्ट भएको उल्लेख गरिएको छ ।
स्वच्छ पिउने पानी नागरिकको अधिकार भएकोले नगरवासीहरुलाई स्वच्छ पिउने पानीको व्यवस्था गर्न नेपाली कांग्रेस जस्तोसुकै मूल्य चुकाउन तयार रहेको विज्ञप्तीमा उल्लेख गर्दै विधि र विधान उल्लंघन गर्न कसैलाई पनि छुट नभएकोले विधानको मर्म र भावना अनुरुप सम्वन्धित निकायहरुले समेत काम गर्नु पर्नेमा जोड दिईएको छ ।
