धनकुटा २५ असार । सशस्त्र प्रहरी बल नेपाल प्रदेश १, बराह बाहिनी मुख्यालय पकली सुनसरीका बाहिनीपति सशस्त्र प्रहरी नायव महानिरीक्षक नगेन्द्रबहादुर थापाले आज मल्टिपरपोज भवनको उद्घाटन गरेका छन् । सो भवन सशस्त्र प्रहरी बल ६ नं. गुल्म हेडक्वाटर छिन्ताङ्ग धनकुटा परिसरमा निर्माण गरिएको हो ।
उद्घाटन पछि बाहिनीपति डिआईजी थापाले देशमा स्थापना भएको कान्छो सुरक्षा निकाय सशस्त्र प्रहरी बलले विशेषगरी सीमा सुरक्षा र विपद व्यवस्थापनमा विशेष भूमिका निर्वाह गरिरहेको बताए । उनले सीमा क्षेत्रबाट हुने तश्करी, चोर पैठारी नियन्त्रणमा बल सफल भैरहेको जानकारी दिए । यसबाहेक देशमा शान्तिसुरक्षा कायम गर्न र विभिन्न सामाजिक कार्यमा स्थानीय नागरिहरुसँगको सहकार्यमा गर्दै आएको जानकारी दिए ।
डिआईजी थापाले सशस्त्र प्रहरी बलले मूलघाटमा विपद व्यवस्थापनमा गरिरहेका उद्दार कार्यको प्रशंसा गर्दै देशैभर विपद व्यवस्थापनका क्षेत्रमा बलले उल्लेखनीय कार्य गर्दै आएको जानकारी दिए । उनले यस गुल्ममा निर्माण गरिएको मल्टिपरपोज भवन निर्माण सम्पन्न गर्न सहयोग गर्ने स्थानीय तहहरु, धनकुटा नगरपालिकाका वडाध्यक्षहरु, सहयोगी व्यापारी व्यवसायी तथा श्रमदान गर्ने बलका जवानहरुलाई धन्यवाद दिए । सो अवसरमा डिआईजी थापाले श्रमदान गर्ने प्रहरी जवानहरुलाई प्रशंसा पत्र वितरण गरेका थिए । सो अवसरमा बाहिनीपति डिआईजी थापाले गुल्म परिसरमा एभोकाडोको विरुवा रोपेका थिए ।
सो अवसरमा गुल्मका गुल्मपति सशस्त्र प्रहरी नायव उपरीक्षक बालकृष्ण श्रेष्ठले निर्माण सम्पन्न भएको भवनको लागत श्रमदानका वारेमा जानकारी दिए । उनले भवन अभावमा तालिमलगायतका विविध कार्यक्रमहरु संचालन गर्न कठिनाई भैरहेकोमा अब सहज हुने जानकारी दिए । उनले सशस्त्र प्रहरी बलको स्रोत तथा स्थानीयतहहरु र धनकुटा नगरपालिकाका सवै वडाहरु, विभिन्न संघसंस्थाहरु तथा सशस्त्र प्रहरीको श्रमदानले भवन निर्माण गरिएको जानकारी दिए । सोहि अवसरमा गुल्मपति डिएसपी श्रेष्ठले धनकुटा नगरपालिकाको सहयोगमा २० हजार लिटर क्षमताको खानेपानीको ट्याकी निर्माण सम्पन्न गरिएको जानकारी दिए । सो कार्यक्रमको संचालन सशस्त्र प्रहरी निरीक्षक जितेन्द्र बस्नेतले गरेका थिए ।
सो कार्यक्रममा प्रमुख जिल्ला अधिकारी सिताराम कार्की, प्रहरी उपरीक्षक सुदर्शनप्रसाद कोईराला, सल्लेरी बरख गणका मेजर सुरेन्द्रबहादुर कार्की, राष्ट्रिय अनुसन्धानका डिएपी सञ्जय मण्डल, नेकपाका सचिव ऋषिराम ढुंगाना, नेपाली कांग्रेसका सचिव विजय सन्तोषी राई, धनकुटा उद्योग बाणिज्य संघका अध्यक्ष उमेश घिमिरे, नेपाल पत्रकार महासंघका सभापति राजेश्वरबहादुर श्रेष्ठ, धनकुटा नगरपालिका वडा नं. १ का अध्यक्ष निरेन तामाङ्ग, वडा नं. ४ का वडाध्यक्ष जमशेर राई, वडा नं. ६ का वडाध्यक्ष नरेश श्रेष्ठ, वडा नं. ७ का वडाध्यक्ष जंगवहादुर राई, जिल्ला युवा समतिका अध्यक्ष अर्जुन छारा राई, निगाले सिमेन्टका सञ्चालक दिनेश पौडेललगायत व्यवसायी, पत्रकार, समाजसेवी तथा स्थानीयवासीहरुको सहभागीता रहेको थियो ।
