धनकुटा । प्रदेश १ का आर्थिक मामिला तथा योजना मन्त्री इन्द्रबहादुर आङ्वोले राजधानीको क्षतिपूर्ति हुने गरी धनकुटाको विकासमा प्रदेश सरकार चिन्तित रहेको जानकारी दिए । मन्त्री आङ्वोले प्रदेशको राजधानी धनकुटा बनाउने चाहना हुदाँहुदै नसकेकोले मुख्यमन्त्रीको सम्पर्क कार्यालय देखि विभिन्न प्रदेशस्तरीय कार्यालयहरु स्थापना गरेको बताए । उनले धनकुटामा पाँच सय शैयासहितको शिक्षण अस्पताल स्थापना गर्न यस आवमा साढे १६ करोड बजेट विनियोजन गरेको बताए ।
मन्त्री आङ्वोले धनकुटाको बेलाहारमा गुठी–बाघखोर–छिदी सडकको कालोपत्रे गर्ने कार्यको शिलान्यास पछि आयोजित आमसभामा यस्तो बताएका हुन् । सो अवसरमा मन्त्री आङ्वोले धनकुटाको ऐतिहासिक शहीदभूमि तथा पवित्र धार्मिकस्थल छिन्ताङदेवी मन्दिरसम्म कालोपत्र गरिने आश्वासन दिए । उनले धनकुटा ऐतिहासिककालदेखि प्रशासनिक, शैक्षिक, स्वास्थ्य केन्द्रका रुपमा रहिआएकोले यसको जीवन्तता कायम राख्दै थप सुविधाका लागि कुनै कसर बाँकी नराख्ने आश्वासन दिए ।
मन्त्री आङ्वोले यो सडक निर्माण सम्पन्न भएपछि कृषिउपज आयात गर्नेभन्दा यहाँ उत्पादित वस्तु निर्यात गर्न उत्पादनमा जोड दिन आग्रह गरे । उनले जवसम्म आर्थिक रुपमा सम्पन्न होईदैन तवसम्म सडकबाट फाईदा लिन नसकिने बताए ।
मन्त्री आङ्वोले प्रदेश सरकारले यस आवमा पूर्वाधार विकास मा ४५ प्रतिशत बजेट विनियोजन गरेको बताए । उनले पूर्वाधार विकास बाहेक प्रदेशमा कृषि र पर्यटनको प्रचुर संभावना रहेकाले कृषि र पर्यटनलाई उच्च प्राथमिकतामा राखेको बताए ।
मन्त्री आङ्वोले देशको कुल जनसंख्याको दुइतिहाई कृषिमा निर्भर रहेको भएपनि आफैलाई खानपुग्ने उत्पादन गर्न नसकेको बताउँदै कृषिमा यान्त्रीकरण र व्यवसायीकरणको खाँचो रहेको औल्याए । उनले संघीयता कार्यान्वयन गर्न तीनै तहको सरकार एकतावद्ध हुनुपर्ने बताउँदै एउटा सरकार असफल भए संविधान र संघीयता असफल हुने बताए ।
मन्त्री आङ्वोले दुई तिहाइको सरकारले काम गर्न नसकेको गुनासो आइरहे पनि एकै रातमा काम दुई तिहाइको सरकारले गर्न नसक्ने बताए । उनले ठूला योजनाका काम संघीय सरकारले, मझौला खालका योजनाका काम प्रदेश सरकारले र साना तथा प्रत्यक्ष जनतासँग सरोकार राख्ने काम स्थानीय सरकारले गरिरहेको दावी गरे ।
पूर्वाधार विकास कार्यालय भोजपुरको २१ करोड ७३ लाख ७९ हजार ४ सय २३ रुपैयाँ ५१ पैसाको सडक कालोपत्र हुन लागेको हो । सडक कालोपत्रेको ठेक्का रमण दिव्यज्योती रोजन जेवी काठमाण्डौले पारेको पूर्वाधार विकास कार्यालय भोजपुरका प्रमुख राजन राज केडीले जानकारी दिए । उनकाअनुसार सडक कालोपत्रेको काम दुई वर्ष भित्र सक्ने गरी निर्माण व्यवसायी कम्पनीसँग सम्झौता भएको जानकारी दिए ।
सो अवसरमा प्रदेश सांसद तथा प्रदेश विधायन समितिको अध्यक्ष इन्द्रमणी पराजुलीले धनकुटाको विकास हुदैन भनेर चिन्ता लिनु नपर्ने बताउँदै प्रदेश सरकार धनकुटाको विकासमा चिन्तित रहेको बताए । उनले बेलहारामा विमानस्थल निर्माणका लागि पनि पहल भैरहेको बताए । यस्तै प्रदेश सांसद निरन राईले निर्माणाधीन गुठीटार बुलहारा सडक शहीदभूमिसम्म विस्तार गरिने जानकारी दिदै यो सडक निर्माण पछि पछाडी रहेका बेलहाराको मुहार फेरिने बताए ।
सो अवसरमा जिल्ला समन्वय समितिका प्रमुख टंक चुवानले सडक निर्माणले मात्र समृद्धि नआउने बताउँदै त्यसका लागि कृषि उत्पादनमा जोड दिन सुझाव दिए । यस्तै नगरप्रमुख चिन्तन तामाङले निर्वाचनताका दिएको आश्वासन पुरा गरेका बताए । हेमचन्द्र किरातीले सञ्चालन गरेको कार्यक्रममा वडा नं. ९ का वडाध्यक्ष सन्दिप रायमाझीले सडक निर्माणमा वजेट विनियोजन गरिदिएकोमा मन्त्री आङ्वो, पूर्वाधार मन्त्रालयप्रति आभार प्रकट गरे । सो अवसरमा मन्त्री आङ्वो लगायतलाई पञ्चेवाजासहितले स्वागत गरेका थिए ।