धनकुटा । गर्जुवा खोलामा माटोको लेदो सहित आएको बाढीले अवरुद्ध वनेको कोशी राजमार्ग अन्र्तगत धरान–धनकुटा सडक करिव ८ घण्टा पछि खुलेको छ ।
माटोको लेदो सहित आएको वाढीले सडक पुरिदिएपछि विहिवार राति १२ बजेदेखि सडक अवरुद्ध वनेको थियो । सडक अवरुद्ध हुँदा सवारी आवातजावत वन्द भएको थियो ।
डिभिजन सडक कार्यालय धनकुटाको स्काइभेटरले सडकमा रहेको लेदो सहितको माटो पन्छाइदिएपछि एक तर्फी रुपमा सडक खुलेका सुपरभाइजर अम्विका राईले बताए ।
कोशी पहाडका धनकुटा सहित भोजपुर, संखुवासभा, तेह्रथुम पुग्न संयौं सवारी साधन जाममा परेका थिए । विद्युतको निर्माणाधिन हाइटेन्सन लाइन वनाउन खनिएको नयाँ वाटोको माटो भत्किएर गर्जुवा खोलामा झर्दा सोही वाटो वगाएर सडक अवरुद्ध पारेको उनले बताइन् ।
यस भन्दा पहिल्यै वर्खाको बेला गर्जुवा खोलामा आउने वाढीले राजमार्ग पटक–पटक अवरुद्ध हुने गरेको थियो ।
डिभिजन सडक कार्यालयले वर्खा लाग्नु भन्दा अगावै वाढी रोकथामको लागि विभिन्न संरचना निर्माण गरेर सर्तकता अपनाएको थियो । वाढीमा आएको माटो खोलाको भन्दा पनि नयाँ सडक बनाउँदाको माटो भएको कारण राजमार्ग अवरुद्ध भएको उनले दावी गरिन् ।
त्यस्तै लगातारको वर्षाको कारणले कोशी राजमार्गका १ दर्जनभन्दा बढी स्थानमा पहिरो खसेको छ । रुद्रबारी, गुठीटार, जिरोप्वाइन्ट लगायतका दर्जनौं स्थानमा पहिरो गएको छ ।
यस्तै पहिरोले विद्युत लाइनको पोल भत्काइदिएपछि धनकुटा सदरमुकाम सहित कोशी पहाडका भोजपुर, संखुवासभा र तेहूथममा विद्युत आपूर्ति अवरुद्ध वनेको छ ।
कोशी राजमार्ग अन्र्तगत धरान–धनकुटा सडक खण्डको साँगरीगढी गाउँपालिकाको लावरवोटै नजिकै पहिरो खसेर ३३ केभी लाईन प्रशारणको तीन वटा विद्युत पोल भत्किएपछि शुक्रवार विहान ५ बजेदेखि विद्युत आपूर्ति अवरुद्ध वनेको नेपाल विद्युत प्राधिकरण धनकुटा वितरण केन्द्रका प्रमुख पवन कुमार यादवले बताए ।
पहिरोले पोल सँगै विद्युत लाइनको तार समेत चुडाइदिएको छ । ‘धनकुटाबाट प्राविधिक टोली मर्मत सम्भार भइरहेको छ’ उनले भने ‘पहिरो खसेको स्थान भिरालो भएको कारण काम गर्न केही असहज वनेको छ ।’ विद्युत आपूर्ति चालु हुन करिव ४ घण्टा समय लाग्ने बताइएको छ ।
