धनकुटा । धनकुटाका प्रमुख जिल्ला अधिकारी सीताराम कार्कीको इलाम सुरुवा भएका छन् । सरकारले गत भदौ ६ गते ३१ प्रजिअको सरुवा गर्ने क्रममा प्रजिअ कार्कीको सरुवा गरिएको हो । प्रजिअ कार्की गत वर्ष भदौ ६ गते प्रजिअका रुपमा धनकुटा सरुवा भएर आएका थिए । एक वर्ष १० दिन पछि धनकुटाबाट विदा भएर जादैछन् ।
प्रजिअ कार्कीलाई जिल्लाका कार्यालयहरुको तर्फबाट आज आईतवार जिल्ला प्रशासन कार्यालयमा एक कार्यक्रमको आयोजना गरी विदाई गरियो । सो अवसरमा सरुवा भएर गएका जिल्लामा पनि धनकुटामा जस्तो कुसलतापूर्वक कार्यसम्पादन गर्न सफलताका लागि शुभकामना दिएका थिए । सो अवसरमा प्रहरी उपरीक्षक सुदर्शनप्रसाद कोईराला, सशस्त्र प्रहरी नायव उपरीक्षक सचिन कर्माचार्य, प्रशासकीय अधिकृतहरु रामनारायण श्रेष्ठ, सुधिर साफीलगायत विभिन्न कार्यालयका प्रमुखहरुको उपस्थिति रहेको थियो ।
यस्तै नेपाल रेडक्रस सोसाईटी, अन्तरपार्टी महिला सञ्जालले पनि विदाई गरेका छन् ।
प्रजिअ कार्कीको स्थानमा झुम्का कारागारका प्रमुख डा. कृष्णबहादुर घिमिरे कायम मुकायम प्रजिअका रुपमा आउने भएका छन् । घिमिरे यस धनकुटामा सहायक प्रजिअका रुपमा कार्यरत रहिसकेका छन् ।