धनकुटा । दुई तिहाईको दम्भले कम्युनिष्ट सरकार सर्वसत्तावादतर्फ उन्मुख भएको छ । सो कुरा राष्ट्रिय प्रजातन्त्र पार्टी संयुक्तका महामन्त्री एवं पूर्व वाणिज्य तथा आपूर्तीमन्त्री सुनिलबहादुर थापाले बताएका हुन् । गृहजिल्लामा पत्रकार भेटघाट कार्यक्रममा महामन्त्री थापाले सरकारको अधिनायकवादी चरित्रविरुद्ध कम्युनिष्ट इतर सबै राजनीतिक दल वीच बृहत् लोकतान्त्रिक एकता आवश्यक रहेको बताए ।
पार्टी संगठन सुदृढिकरण अभियानमा आज सोमबार धनकुटामा आएका महामन्त्री थापाले नेकपाको दुईतिहाईको सरकार गठन पछि देशमा अराजकता, भ्रष्टाचार, बलात्कार बढेको आरोप लगाए । उनले आफु मन्त्री हुदाँ नेपाल आयल निगममा रहेको अर्बै रुपैया ऋण तिर्न सफल भएको जानकारी दिए । उनले अहिलेको सरकार गैरजिम्मेवार बनेको बताए । भारतबाट पेट्रोलियम पदार्थ ढुवानीका लागि पाईपलाईन बनाउने सहमति गरी निर्माण शुरु गरेको कार्यलाई वर्तमान सरकार आफुले नै गरेको भन्दै प्रचारवाजीमा लागेको प्रति आपत्ति जनाए । उनले भारतीय पेट्रोलियम मन्त्री धर्मेन्द्र प्रधानसँग सम्झौतामा हस्ताक्षर गरी निर्माण गरिएको जानकारी दिए । उनले बरु केपी ओलीको नेतृत्वमा सरकार गठन भएपछि सो निर्माण कार्यलाई अवरोध गरेको उल्लेख गरे ।
महामन्त्री थापा एक महिना अघि साविक राष्ट्रिय प्रजातन्त्र पार्टी प्रजातान्त्रिक धनकुटाका २१ सदस्य मध्ये जिल्ला पार्टी अध्यक्ष सहित १७ जनाले पार्टी छोडेको घोषणा गरेपछि पहिलो पटक धनकुटा अएका थिए । यस सम्बन्धमा उनले राप्रपा संयुक्त गठन भएपछि प्रजातान्त्रिक स्वतः विघटन भएको उल्लेख गरे । उनले जिल्लामा केहि हप्ता अघि लक्ष्मी सुब्बाको संयोजकत्वमा ११ सदस्यीय राप्रपा संयुक्त जिल्ला सञ्चालन समिति गठन गरिएको जानकारी दिए । उनले अब चाँडै जिल्ला अधिवेशन गरिने जानकारी दिए ।
महामन्त्री थापाले स्थानीय सरकारसँग समन्वय गरी पूर्वप्रधानमन्त्री स्व. सूर्यबहादुर थापाको उपयुक्र्त स्थानमा शालिक निर्माण गर्ने जानकारी दिए ।