धनकुटा । नेपाली कांग्रेसले संचालन गर्न लागेको दोस्रो चरणको जागरण अभियान भदौं २४ गतेबाट शुरु गर्ने भएको छ । हिमाल, पहाड, तराई र मधेस (हिपतम) भन्ने मुल नाराका साथ देशैभर अभियान शुरु गरिने छ । यसैक्रममा धनकुटाले दुवै वटा प्रदेश सभा निर्वाचन क्षेत्रमा अभियान शुरु गर्ने जनाएको छ ।
सो अभियान अन्र्तगत धनकुटाका प्रदेश सभा निर्वाचन क्षेत्र नं. (क) अन्तर्गत साँगुरीगढीको डाँडाबजार स्थित पर्यटकीय केन्द्र ध्वजे डाँडामा र प्रदेश सभा निर्वाचन क्षेत्र (ख) को पाख्रिवास नगरपालिकाको पर्यटकीय केन्द्र सन्सारी ताल तलौया सिमसार क्षेत्रमा जागरण अभियानको उद्घाटन गरिने नेपाली कांग्रेस जिल्ला सचिव विजयसन्तोषी राईले जानकारी दिए । अभियान भाद्र २४ गते असोज ७ गतेसम्म संचालन गरिने सचिव राईले जानकारी दिए ।
सो अभियानको उद्घाटन देशभर एकसाथ महामानव वीपी कोईरालाको १ सय ६ औ जन्म जयन्तीको अवसर पारेर भाद्र २४ गतेदेखि शुरु गरिने छ । सो अभियान केन्द्रिय प्रतिनिधि र पार्टीका नेताहरुले धनकुटाको दुवै निर्वाचन क्षेत्रमा १ सय ६ वटा विरुवा रोपेर उद्घाटन गर्ने पार्टीका कोषाध्यक्ष दिनेश राईले जानकारी दिए ।
सो अभियानका लागि निर्वाचन क्षेत्र (क) का लागी नेपाली कांग्रेसका युवा नेता विश्वदिप लिङ्देन र प्रदेश सभा निर्वाचन क्षेत्र (ख) का लागी नेता घनेन्द्र कुँवरलाई केन्द्रिय प्रतिनिधिको रुपमा पठाएको धनकुटा कांग्रेसले जनाएको छ ।
सो अभियान कांग्रेसले जिल्लाको दुवै प्रदेश सभा निर्वाचन क्षेत्र अन्र्तगतका ७ वटै स्थानीय तहहरु र ६० वटै वडाहरुमा सञ्चालन गर्ने सचिव राईले जानकारी दिए । सो अभियानको क्रममा विभिन्न रचनात्मक तथा सामाजिक कार्यहरु गर्ने जनाएको छ । अभियानको अन्तिम दिन असोज ७ गते जिल्ला सदरमुकाम धनकुटामा भव्य रुपमा समापन गर्ने कार्यक्रम रहेको सचिव राईले जानकारी दिए । सो अभियानको क्रममा वर्तमान दुई तिहाईको सरकारले गरेका जनहित विपरितका कार्यहरुको भण्डाफोर गर्ने जनाएको छ । सो क्रममा सरकारको सर्वसत्तावादका विरुद्ध जनतामा जागरण ल्याउने, हत्याहिंसा शान्तिसुरक्षा नियन्त्रणमा सरकारको बेवास्ता उजागर गर्ने सचिव राईले जानकारी दिए ।
अभियानमा सरकारले विकासको नारा दिएर देशलाई ऋणमा डुवाएको, प्रधानमन्त्री रोजगारको नाममा ब्रम्हलुट गरेकोलगायतको विषय आमनागरिकलाई सुसूचित गर्ने जनाएको छ ।
नेपाली कांग्रेसले यस अघि पहिलो चरणको एक महिने जागरण अभियान पनि सात वटै स्थानीय तह र ६० वटै वडाहरुमा विभिन्न कार्यक्रमहरुको आयोजना गरी संचानल गरेको थियो ।