धनकुटा । चौथौ संविधान दिवस भव्यताका साथ मनाउन जिल्ला समन्वय समितिका प्रमुख टंकबहादुर चुवानको संयोजकत्वमा समिति गठन गरिएको छ । प्रमुख चुवानको अध्यक्षतामा बसेको सर्वपक्षीय बैठकले सो निर्णय गरेको हो ।
सो बैठकले असोज २ गतेदेखि ४ गतेसम्म विभिन्न रचनात्मक कार्यक्रमहरु गरी संविधान दिवस मनाउने निर्णय गरेको जिल्ला समन्य समिति अधिकारीले जानकारी दिए । कार्यक्रम अनुसार असोज २ गते सहिद भिमनारायण चोकदेखि मदन चोकसम्म नगरपालिकोको आयोजनामा सरसफाइृ गरिने छ । सोहि दिन उद्योग वाणिज्य संघको आयोजनामा जिल्ला अस्पतालका विरामीहरुलाई फलफुल वितरण गरिने जनाएको छ ।
यसैगरी असोज ३ गते संविधान जारी भएको दिन दिनको ११ वजे सहिद भिमनारायणचोकबाट प्रभातफेरी शुरु भई त्रिवेणी माविमा सभामा पिरणत हुने छ । सो अवसरमा विशिष्ट व्यक्तिहरुबाट संविधान दिवसको शुभकामना तथा स्थानीय हाम्रो पाठशालाको संयोजनमा विविध सांस्कृतिक कार्यक्रम आयोजना गरिने पाठशालाका सरोज भूजेलले जानकारी दिए ।
यसैगरी असोज ४ गते नेपाल नेत्रज्योती संघको आयोजनामा जिल्ला कारागारका कैदीबन्दीहरुलाई निःशुल्क आँखा परिक्षण गरिने संघका अध्यक्ष द्रोण गुरागाईले जानकारी दिए । सो तीन दिने दिवसको अवसरमा नेपाल पत्रकार महासंघको समन्वयमा स्थानीय रेडियो एफएमबाट संविधान सम्बन्धि राजनीतिक दलका नेता तथा बुद्धिजीवीहरुसँग परिसम्वाद कार्याक्रम सञ्चालन गरिने छ ।
सो बैठक जिसस प्रमुख चुवानको अध्यक्षतामा बसेको थियो । बैठकमा धनकुटा नगरपालिकाका उपप्रमुख शकुन्तला बस्नेत, प्रजिअ डा. कृष्णबहादुर घिमिरे, नगरपालिकाका प्रमुख प्रशासकीय अधिकृत रामबहादुर थापा, प्रहरी उपरीक्षक सुदर्शन कोईराला, सशस्त्र प्रहरी उपरीक्षक सचिन कर्माचार्य सहभागिता रहेको थियो । यस्तै युवा समितिका अध्यक्ष अर्जुन छारा, उद्योग वाणिज्य संघका अध्यक्ष उमेश घिमिरे, नेत्रज्योती संघका अध्यक्ष द्रोण गुरागाई लगायत विभिन्न संघसंस्थाका प्रमुख तथा प्रतिनिधि तथा जिल्लास्थित विभिन्न कार्यालयका प्रमुख तथा प्रतिनिधिहरुको सहभागिता रहेको थियो ।