धनकुटा । नेपाली कांग्रेसको राष्ट्रिय जागरण अभियानको दोस्रो चरणको कार्यक्रम शुरु भएको छ । कार्यक्रमअनुसार जिल्लाको ७ वटै स्थानीय तहहरुमा गरिदै छ । अभियानको अन्तिम दिन असोज ७ गते जिल्ला सदरमुकाम धनकुटा बजारमा भव्य रुपमा कार्यक्रम गर्ने नेपाली कांग्रेसले जनाएको छ ।
अभियानको कार्यक्रम अनुसार असोज ३ देखि असोज ६ गतेसम्म स्थानीय तहहरुमा पालिका स्तरीय जागरण अभियान कार्यक्रम आयोजना गरिने छ । र अन्तिम दिन असोज ७ गते जिल्ला सदरमुकाम धनकुटा बजारमा दुवै क्षेत्रको संयुक्त रुपमा सभा गरी जागरण अभियानको समापन गर्ने पार्टीका जिल्ला सचिव विजय सन्तोषी राईले जानकारी दिए ।
अभियानअन्तर्गत जिल्लाको प्रदेश सभा निर्वाचन क्षेत्र (क) को सहिदभूमी गाउँपालिको थलथले बजारमा असोज ३ गते गरी अभियानको शुरुवात गरिने छ । यस्तै चौविसे गाउँपालिकाको बोधेमा असोज ४ गते, साँगुरीगढी गाउँपालिकाको भेडेटारमा असोज ६ गते र धनकुटा नगरपालिकाको धनकुटा बजारमा असोज ७ गते जागरण अभियान कार्यक्रम रहेको कांग्रेस प्रदेश सभा क्षेत्रीय कार्यसमिति (क) का सभापति जितेन्द्र रुम्दालीले जानकारी दिए ।
यसैगरी प्रदेश सभा (ख) को अभियान पाख्रिवास नगरपालिकाबाट शुरु गरिने जनाएको छ । अभियान पाख्रिवासमा असोज ४ गते आयोजना हुने छ । यस्तै महालक्ष्मी नगरपालिकाको जितपुर बजारमा असोज ५ गते र छथरजोरपाटी गाउँपालिकाको जोरपाटीमा असोज ६ गते पालिका स्तरीय जागरण अभियान संचालन गरिने ख का क्षेत्रीय सभापति इन्दिरा थापाले जानकारी दिईन् ।
अभियानका लागि केन्द्रिय प्रतिनिधि विश्वदिप लिङदेन सहितको स्थानीय नेता तथा वडा प्रतिनिधिहरु अहिले जिल्लाको ६० वटै वडाहरुमा गई वडास्तरीय अभियान सञ्चालन गरिरहेको जनाएको छ ।