धनकुटा । जनआन्दोलनको कमाण्डर तथा सर्वोच्च नेता स्व. गणेशमान सिंहको स्मृतिमा श्रद्धाञ्जली कार्यक्रम गरियो । सो अवसरमा वक्ताहरुले सिंहको जस्तो त्याग, समर्पण र बलिदान त सम्भव छैन तर उहाँको त्यो गुणको केहि अंक अहिलेको नेताहरुमा हुनु जरुरी भएको बताएका छन् । र यहि नै स्व. गणेशमान सिंह प्रति सच्चा श्रद्धाञ्जली हुने कार्यक्रममा सहभागीहरुले बताएका छन ।
स्व. सिंहको स्मृति दिवस तथा धनकुटा नगरपालिका वडा नं. ६ को जागरण अभियानको संयुक्त कार्यक्रममा कांग्रेस जिल्ला सभापति अग्नीप्रसाद पौडेलले जागरण अभियानले सवै नेता तथा कार्यकर्ताहरुमा स्व. गणेशमान सिंहको पदप्रति लालच नगरी कतव्र्य परायण हुन आग्रह गरे ।
सो कार्यक्रममा सचिव विजय सन्तोषी राई, कोषाध्यक्ष दिनेश राई, जिल्ला सदस्य तथा जागरण अभियानका प्रतिनिधि सीता प्रधान, नगर सभापति रोशन श्रेष्ठलगायतले स्व. गणेशमान सिंह प्रति श्रद्धाञ्जली व्यक्त गर्दै सिंहको योगदानको वारेमा चर्चा गरेका थिए । उनीहरुले जागरण अभियानको क्रममा कुनै पद विना पनि देश र जनताको सेवा गर्न सकिन्छ भन्ने सर्वोच्च नेता स्व. सिंह योगदानको वारेमा सबैमा जानकारी दिनु पर्ने बताए ।
कार्यक्रम धनकुटा नगरपालिका ६ का निर्वतमान सभापति नरेश श्रेष्ठको अध्यक्षतामा सम्पन्न भएको थियो । कार्यक्रममा स्वागत मन्तव्य वडा सदस्य हिरादेवी राईले गरेका थिए । सो कार्यक्रममा जिल्ला सदस्यहरु लोकेन्द्र रायमाझी, विष्णु पौडेल, अम्विका परियार, सुमना तिम्सिना, वडा नं. ६ का पूर्व वडाध्यक्ष राजेश्वरबहादुर श्रेष्ठ, नेपाल प्रेस युनियनका अध्यक्ष हिमा चेम्जोङ, राजेन्द्र खड्का, कांग्रेस क्षेत्र (क) का कोषाध्यक्ष निरुपा राई, नगर उपसभापति मिलन खड्की, वडासदस्य मुना देवी रम्तेल, रोजिना खड्की, संगिता श्रेष्ठ, महिला संघ वडा ६ का अध्यक्ष कुसुम श्रेष्ठ, सदस्यहरु मन्दिरा भट्टराई, सुजता श्रेष्ठ लगायतको उपस्थिति रहेको थियो ।
