धनकुटा । नेपाली कांग्रेस धनकुटा नगर समितिका पूर्व सभापति स्वर्गीय केदारलाल सिंहको पार्थिक शरीरलाई चार तारे झण्डा ओढाएर अन्तिम श्रद्धाञ्जली दिईएको छ । पूर्वसभापति स्व. सिंहको पार्थिव शरीरमा पूर्व उपप्रधानमन्त्री तथा नेपाली कांग्रेसका पूर्व महामन्त्री प्रकाशमान सिंह र नेपाली कांग्रेस धनकुटाका निर्वतमान सभापति तथा संविधान सभा सदस्य मनोहरनारायण श्रेष्ठले नेपाली कांग्रेसको चार तारे झण्डा ओढाएर अन्तिम श्रद्धाञ्जली व्यक्त गरेका थिए ।
सो अवसरमा संविधान सभा सदस्य श्रेष्ठले निरंकुश तानाशाही पञ्चायती व्यवस्थाकालको कठिन र असहज परिस्थितिमा स्व. सिंहले प्रतिबन्धित नेपाली कांग्रेस पार्टीलाई धनकुटामा संगठित गर्दै विस्तार गर्न महत्वपूर्ण योगदान दिनु भएको भनि जानकारी दिए ।
स्व. सिंह विगत दुई वर्षदेखि मृगौलाको समस्याबाट पीडित थिए । स्व. सिंहको उपचारकै क्रममा निधन भएका थिए । स्व. सिंहको काठमाण्डौस्थित पशुपति आर्यघाटमा अन्त्येष्ठी गरिएको छ ।
श्रद्धाञ्जली कार्यक्रममा कांग्रेस ललितपुरका सभापति तथा संविधानसभा सदस्य मदनमान अमात्य, ३ नम्वर प्रदेश सभाका सदस्य नरोत्तम बैद्य, धनकुटा कांग्रेसका पूर्वसभापति हरी अधिकारी, नेपाली कांग्रेस धनकुटा काठमाण्डौ सम्पर्क समितिका सभापति भिमबहादुर थापा, कांग्रेस महाधिवेशन प्रतिनिधि उदय लिम्बु, धीरेन्द्र मिश्र लगायतले स्वर्गीय सिंहको पार्थिव शरीरमा फुलमाला चढाई श्रद्धाञ्जली अर्पण गरेका थिए ।
यस्तै स्व. सिंहको निधनले नेपाली कांग्रेस धनकुटाले एउटा असल अभिभावक गुमाएको जिल्ला सचिव विजय सन्तोषी राईले बताए ।
पिता गौरीलाल सिंहका ५ छोराहरुमध्ये जेष्ठ सुपुत्रका रुपमा स्व. सिंहको जन्म वि. सं. १९९१ साल माघ १२ गते धनकुटा सिरानबजारमा भएको थियो । स्व. सिंहको श्रीमती इन्द्र कुमारी सिंह छिन् । यस्तै छोराहरु अस्मिन र अर्विन सिंह र छोरीहरु लिना, मिना र सोना सिंह छन् ।