धनकुटा मंसिर १३ । जलवायु परिवर्तन अनुकुलन नमूना गाउँ कार्यक्रम अन्तर्गत किसानहरुलाई प्लाष्टिक टनेल वितरण गरिएको छ । सो टनेल धनकुटाको कागतेका किसानहरुलाई एक कार्यक्रमका वीच वितरण गरियो ।
पर्डेप नेपाल धनकुटाको आयोजना तथा धनकुटा नगरपालिका र युएनडिपीको आर्थिक सहयोगमा कागतेको मार्गा पात्ले टोलवस्ती संगठनका ४० किसान परिवारलाई वितरण गरिएको हो ।
सो वितरण कायृक्रम मार्गा पात्ले टोलबस्ती संगठनका अध्यक्ष मिनबहादुर कार्कीको अध्यक्षतामा सम्पन्न भएको थियो । कार्यक्रममा प्रमुख अतिथि धनकुटा नगरपालिकाका प्रमुख चिन्तन तामाङ, अतिथि वडा नं. ३ का वडाअध्यक्ष विकास घिमिरेलगायतले किसानहरुलाई प्लाष्टिक टनेल वितरण गरेका थिए ।
कार्यक्रममा नगर प्रमुख चिन्तन तामाङले किसानहरुलाई बैज्ञानिक कृषि यन्त्रसहित आधुनिक कृषि प्रणालीमा लैजान र जलवायु परिवर्तन रोकथाम गर्ने उद्देश्यले प्लाष्टिक टनेल वितरण गरिएको बताए । उनले देशलाई आत्मनिर्भर बन्नसक्ने कृषि खेतीलाई नगरपालिकाले प्राथमिकतामा राखेको जानकारी दिए । उनले धनकुटामा फलफुबाट मनग्य आम्दानी गर्न सकिने सम्भावना भएकोले नगरलाई एभोकाडोको राजधानी घोषणा गरिएको बताए ।
कार्यक्रममा वडा नं. ३ का वडाअध्यक्ष विकास घिमिरेले ३ नं. वडाको प्रमुख आम्दानीको स्रोत कृषि भएको बताउँदै किसानलाई सहज सिचाईका लागि टनेल वितरण गरिको जानकारी दिए । कार्यक्रममा नगर कार्यपालिका सदस्य सुलोचना बसेल, वडासदस्यहरु बाबुराम मिश्र, मेखबहादुर राई, नगरपालिकाका वातावरण शाखा प्रमुख उपेन्द्र खनाल, पर्डेप नेपालका कार्यक्रम संयोजक मिनप्रसाद सुवेदी, वडा नं. ३ का वडासचिव कृष्ण भण्डारी, दलको तर्फबाट नेपाल कम्युनिष्ट पार्टी (नेकपा) नगर सचिवालय सदस्य लक्षमण घिमिरेले शुभकामना मन्तव्य राखेका थिए।
कार्यक्रम धनकुटा नगरपालिकाको वडा १, २ , ३ र १० वडामा सञ्चालित छ । कार्यक्रअन्तर्गत वडा नं. १ को सिँजाली टोल, थिङ ओख्र बरबोटे, ओक्मालुङका २ सय ५५ घर, वडा नं. २ को मुढे चोक्रोकका एक सय ३५ घर, वडा नं. ३ को मार्गा पात्ले टोलबस्ती संगठनका ४० घर र वडा नं. १० को उत्तरपानीका ७० घर किसानहरुलाई प्लाष्टिक टनेल वितरण गर्ने कार्यक्रम रहेको पर्डेप नेपालका कार्यक्रम संयोजक मिनप्रसाद सुवेदी जानकारी दिए । उनले यो कार्यक्रममा धनकुटा नगरपालिकाका अन्य एक सय घर किसानहरुलाई थप गर्ने तयारी पनि भइरहेको बताए ।