धनकुटा १२ पुस । चौथो राष्ट्रिंय पुनर्निर्माण प्राधिकरण दिवस धनकुटामा पनि मनाईयो । सो अवसरमा आयोजित कार्यक्रमका सहभागीहरुले अहिले पुनर्निर्माणका कामलाई तीव्रता दिनु पर्नेमा जोड दिएका थिए । सो कुरा राष्ट्रिंय पुनर्निर्माण प्राधिकरण जिल्ला आयोजना कार्यालय धनकुटाको आयोजनामा सम्पन्न दिवसमा सहभागीहरुले यस्तो बताएका हुन ।
कार्यक्रममा सहिदभूमी गाउँपालिकाका प्रमुख मनोज राई, चौविसे गाउँपालिकाका उपप्रमुख यज्ञकुमारी रुचाल, नेपाली कांग्रेसका जिल्लासचिव विजयसन्तोषी राई, नेपाल पत्रकार महासंघ धनकुटाका अध्यक्ष राजेश्वरबहादुर श्रेष्ठलगायतले मन्तव्य राखेका थिए ।
सो अवसरमा कार्यालयले भूकम्पले क्षति पु¥याएका जिल्लाका विद्यालय भवनहरु मध्ये ६० वटा विद्यालयको निर्माण सम्पन्न गरिएको र ३ हजार २ सय ३९ वटा घरहरु क्षति भएकोमा पहिलो किस्ता स्वरुप २ हजार ६ सय ४२ जनाले निर्माणका लागी रकम धनकुटामा लिएको जानकारी गराईएको थियो । सो अवसरमा निर्माण सम्पन्न भएको विभिन्न विद्यालयहरुलाई निर्माण सम्पन्न भएको प्रमाण पत्र वितरण गरिएको थियो ।
२०७२ साल वैशाख १२ गतेको भू–कम्पले भएको भौतिक क्षतिलाई तीव्र रुपमा पुनर्निर्माण गर्न २०७३ साल पौष १२ गते प्राधिकरणको स्थापना भएको थियो । सोहि दिनलाई प्राधिकरण स्थापना दिवसको रुपमा मनाउन थालिएको हो ।
जिल्ला समन्वय समितिको हलमा सम्पन्न कार्यक्रममा जिल्ला आयोजना कार्यान्वयन इकाई, अनुदान व्यवस्थापन तथा स्थानीय पूर्वाधार धनकुटाको हालसम्म प्राप्त प्रगति प्रतिवेदन, चुनौतिलगायतको विषयमा छलफल गरिएको थियो । दिवसको अवसरमा पाख्रिवास नगरपालिकाका उपप्रमुख देवकला तिम्सिा, छथरजोरपाटीका उपाध्यक्ष भिमकला श्रेष्ठ, राजनीतिक दलका पदाधिकारीहरु, विभिन्न विद्यालयका शिक्षक, संचारकर्मीलगायतको उपस्थिति रहेको थियो ।
जिल्ला आयोजना कार्यान्वयन इकाई, अनुदान व्यवस्थापन तथा स्थानीय पूर्वाधारका प्रमुख थीरेन्द्र दाहालको अध्यक्षतामा सम्पन्न कार्यक्रम संचालन नायव सुब्बा नानु गुरुङले गरेकी थिईन । शिक्षा इकाइ प्रमुख शम्भूप्रसाद पाण्डेले स्वागत मन्तब्य राखेको कार्यक्रममा इन्जिनियर अस्कार घिमिरेले प्रस्तुती गरेका थिए ।