धनकुटा । मार्गेश्वरी प्राथमिक विद्यालयमा अध्ययनरत बहिरा वालवालिकाहरुलाई न्यानो लुगा ज्याकेट तथा ट्राउजर वितरण गरिएको छ । उनीहरुलाई सो न्यानो लुगा समाजसेवी तथा धनकुटा नगरपालिकाका पूर्व नगर प्रमुख वाङ्दी लामाले एक कार्यक्रमका वीच लगाई दिए ।
सो अवसरमा लामाले अहिलेको कठ्यांग्रिने चिसोमा यस्तोख न्यानो लुगा वितरण गर्न पाउँदा आफुलाई आनन्द लागेको बताए । उनले जिल्लाका विभिन्न फरक क्षमताका विद्यालयहरुमा पौष्टिक आहार लिटो वितरण गर्दै आएको जानकारी दिदै आगामी दिनमा पनि यसलाई निरन्तरता दिने आश्वासन दिए । उनले अन्य विद्यालयहरुमा पनि कार्यक्रम विस्तार गरिने जानकारी दिए । सो विद्यालयमा अध्ययनरत २६ जना विद्यार्थीलाई सो सामग्री वितरण गरेका हुन् । यस्तै उत्तरपानीमा रहेको यस्तै विद्यालयलाई पनि ज्याकेट तथा ट्राउजर सो विद्यालयका प्रधानाध्यापक भुपेन्द्र भण्डारीलाई हस्तान्तरण गरेका थिए ।
विद्यालयका प्रधानाध्यापक श्रवणकुमार राईको अध्यक्षता सम्पन्न कार्यक्रममा नेपाल पत्रकार महासंघका अध्यक्ष राजेश्वरबहादुर श्रेष्ठले अहिलेको चिसो मौसममा जाडोले लुगलुग कामेर पढ्न वाध्य भएका फरक क्षमताका वालवालिकाहरुलाई न्यानो कपडा वितरण गरेकोमा पूर्व नगर प्रमुख तथा समाजसेवी लामाको प्रशंसा गरे । उनले जिल्लामा अरु पनि यस्ता विद्यालयहरु छन्, जहाँ वालवालिकाहरु भरपेट खान पाएका छैनन् । त्यस्ता विद्यालयहरुमा पनि पौष्टिक आहारको व्यवस्था गर्न नगर प्रमुख समक्ष आग्रह गरे ।
कार्यक्रममा कार्यक्रम सञ्चालक भुपेन्द्र भण्डारीले जिल्लामा फरक क्षमताका विद्यालय र विद्यार्थीहरुको अवस्थाका वारेमा जानकारी दिएका थिए ।